Trahadonan di cuido ta bandonando e profesion den cantidad grandi, y cifranan di trahado fuera di servicio pa malesa ta aumenta pa di cinco aña consecutivo, segun Volkskrant, citando un analisis di cuenta anual di 674 compania di cuido.
E reporte, publica pa grupo di accountant EY, a haya cu AO a aumenta na ‘nivel record’ di 5.9% durante 2018 y cu 15.7% di trahadonan di cuido a bandona e profesion pa eherce otro trabou. Cuido di persona cu descapacidad, hende di edad mayor, of cuido psikiatrico en particular ta esunnan cu mas reto, segun e reporte.
Un porcentahe di AO di 4% ta considera halto, y 6% ta alarmante, segun profesor di mercado laboral, Ton Wilthagen a bisa e corant. “E sector di salud den su mes a bira malo. Esaki no ta hende tumando un dia off aki aya. Hende realmente no kier bandona nan cliente.”
E problemanan mas preocupante den cuido di salud ta exceso di trabou y demasiado burocracia. Mientras mas persona ta sali, mas trabou ta keda pa e personanan cu ta keda, y esey ta aumenta e cantidad di AO entre staf di cuido. “Ta un ciclo vicioso cual un par di programa di gobierno no por drecha. E recorte di e crisis a dal duro y lo tuma hopi tempo pa drecha esaki”, Wilthagen a bisa. Den un contesta, e ministerio a bisa cu ta ‘preocupa’ pa e cifranan, pero cu e sector a cuminsa recupera. “Nos ta mira hopi hende ta scoge un trabou den cuido. Tambe nos mester sigura pa nan keda. Esey ta nifica menos regla innecesario, un cantidad normal di trabou, y contractnan fiho”, minister di salud, Hugo de Jonge, y minister di cuido, Bruno Bruins a bisa den un declaracion conhunto.
FNV a bisa cu campaña di gobierno ta enfoca riba reclutamento, pero cu hjende hoben ta lihe pa bay ora nan experimenta e cantidad di trabou. “Nan ta motiva ora nan haci nan stage, pero e realidad di trabou den shift y mester cubri pa otro persona ta un shock. Hende jong no kier pa tuma bentaha di nan. Nan ta bay otro caminda”, vocero di Union, Elise Merlijn a bisa. E actual negociacionnan pa salario ta lento, cu miles di trahadonan jong bayendo den accion dialuna, y unionnan critico di e tacticanan di negociacion di e doñonan di trabou.
“Doñonan di trabou di mal manera ta tira un propuesta riba mesa, y despues ta cuminsa cu intimidacion y ignora”, Merlijn a bisa. “Pero nos ta bou codigo cora, y si nada cambia, e situacion lo bira critico.” E asociacion pa institucionnan di cuido, Actiz, a bisa cu un acuerdo exitoso no lo resolve e problemanan. “Simplemente nos tin demasiado tiki hende pa e calidad di cuido cu nos ta ofreciendo”, Jacqueline Joppe a bisa. El a agrega cu e solucion parcialmente ta den involucra trahadonan no di salud, y tecnologia.
