E number di persona sin cas na Hulanda a duplica pa 39.000 den e ultimo 10 aña, asina oficina di CBS a bisa. Pero e number di hobennan entre 18 pa 30 aña sin ningun luga pa biba a triplifica durante e periodo, segun CBS. Alrededor di 84% di persona sin hogar ta hende homber y mayoria ta concentra den e cuater ciudadnan di mas grandi Amsterdam, Rotterdam, Den Haag y Utrecht.
Alrededor di mita tin background di minoria etnico. E cifra ta inclui personanan cu ta drumi na aire liber, den parkenan, parke di bais, stacionnan y den auto, mescos cu personanan cu ta biba temporalmente cu famianan of amigo. E personanan sin permiso di residencia no ta inclui. E ehercito di salbacion cu ta dirigi refugionan pa personanan sin luga hogar, ta bisa cu tin varios rasonnan pa e aumento aki.
E scarsedad di espacio di refugio temporal ta un problema y tambe tin menos institucionnan na unda cu personanan cu problema por biba bou supervision. E personanan cu ta den prizon tambe tin mas probabilidad di termina riba caya debi na e scarsedad di viviendanan economico. Minister di Salud, Paul Blokhuis a bisa Radio 1 Nieuws cu nan ta ‘shock’ pa e aumento di e falta di vivienda.
“Nos mester tin berguensa cu un pais rico manera nos no por pone un dak decente riba cabes di tur hende”. Varios plannan ta na caminda, incluyendo e esfuerso pa reduci e scarsedad di viviendanan economico y algun specialmente enfoca riba e hobennan , e Minister a bisa.
‘
