Hulanda ta yuda Curaçao… Nos ta warda nan bin yuda tambe?

Nos a tira un bista mas di cerca riba e acuerdo entre gobierno di Curaçao y di Hulanda, cu a acompaña e ‘aanwijzing’ cu gobierno di e isla a haya diabierna pasa. E ta un indicacion cu gobierno Hulandes ta dispuesto di reconoce cu no ta un cuestion di simplemente dicta e islanan kico pa haci, anto ta hacie tambe. Tin cos cu ta asunto di boluntad, politico, pero tin otro asunto cu realmente no ta logra asina facil. Awor cu e dos paisnan den Reino a acorda cu den tres aña di tempo ta bay haci loke den hopi aña no a logra, ta motibo pa por lo menos tira un bista critico riba contenido di e acuerdo aki, tambe pasobra e realidad gubernamental ta bastante similar na esun di nos, y pa no bay comete mesun erornan den nos caso, si algun dia yega asina leu, aunke naturalmente nos ta spera cu no lo ta necesario. Kico asina ta e cosnan cu a hala nos atencion?

For di otro noticia cu a bira conoci den e dianan aki nos por a tuma nota di e opinion di Cft tocante e cuenta anual di 2017 di Curaçao unda ta constata cu e incertidumbre encuanto veracidad di cifra ta acumula te ANG 2.900 miyon. Y cu e incertidumbre aki ta refleha den e reportahenan di cada tres luna cu e pais ta duna como base pa e control y supervision di e propio Cft… Nos sa cu Aruba tin su retonan riba tereno di administracion financiero, pero nos no a yega di mira e tipo di observacion aki den e comentarionan di CAft. No cu nos ta den un situacion totalmente sigur, pasobra na Curaçao nan por bisa cu den pasado nan a yega di haya un declaracion aprobatorio di accountant, mientras Aruba ta tratando na yega na esaki pa prome biaha. Igualmente Curaçao cu ta trata di yega atrobe na e situacion ‘normal’ ey. En todo caso por imagina cu di banda Hulandes ya no ta acepta mas retraso pa trece un cambio drastico den administracion financiero di e isla, y cu den e proximo tres aña kier yega na mehoracion substancial. Cu gobierno insular por cumpli ta otro pregunta, pero aki e apoyo di experto Hulandes por haci un diferencia grandi.

E duda tocante kico por logra den apenas tres aña ta den e plannan pa restructura henter e aparato gubernamental. Aki ta existi e temor cu e Hulandesnan ta tuma demasiado e situacion na Hulanda como punto di salida, mientras cu e realidad riba e islanan, incluyendo Aruba, ta bastante diferente. Por ehemplo den e diferencia di rapidez cu cual por organisa y ehecuta restructuracion den e departamentonan, pa motibo di derechonan legal, forma di consulta cu sindicato cu no por ignora, tur esaki ta haci cu no tin rapidez den ehecucion di e tipo di proceso aki. Positivo di otro banda ta cu den e acuerdo a yega na e iniciativa di crea un ‘Government Academy’. Esaki ta un bon idea, tambe pa nos isla, sin cu nos mester haya nos den algun structura obligatorio cu Hulanda pa haci esaki. Pa hopi aña caba varios persona, dentro di e aparato gubernamental como pafo a vocifera na fabor di un instituto asina. Esaki a bira mas un necesidad ainda pasobra e poco instrumento cu gobierno Arubano tabatin pa educacion y training di su cuadronan, sigur na nivel intermedio, a bay perdi den ultimo decadanan. Esnan cu conoce e procesonan interno di nos gobernacion di tres o dos decada pasa por a ripara con mal prepara hopi di nos empleadonan publico ta, loke no ta nan culpa pasobra ta e dunado di trabao, den e caso aki gobierno, mester pone su standardnan y mantene esakinan tambe. Y ta hustamente esey ta loke no a sucede den nos aparato publico den e ultimo trinta aña sigur, unda a baha e exigencianan minimo pa por bira ambtenaar. Den esaki naturalmente politica a hunga un papel importante, unda a adapta e nivel di exigencia na e nivel di e personanan cu a campaña y cu mester a haya empleo despues. E situacion aki tambe a hiba na excesonan manera e practica den departamento di recurso humano, cu si un persona tin un cierto opleiding, e mester cana e caminda corecto, pasando nechi asina di un schaal pa otro. Al contrario, si e persona no tin e educacion ey, anto e por salta schaal…sigur si el a haya su nombramento politicamente.

Pero pa bolbe na e tema, Curaçao tin un bentaha grandi riba Aruba pa loke ta su aparato gubernamental, y esey ta cu a pasa e basora grandi caba eyden, reduciendo e aparato na bastante menos cu Aruba, mientras nan tin un poblacion mas grandi pa atende. Den e dianan aki, cu e fantasma di indexering lantando cabes atrobe, ta bon pa nos corda cu di un banda no por pospone indexering eternamente, pero di otro banda tin pendiente ainda e tarea di restructura y modernisa nos aparato gubernamental, cu ta un peso enorme riba e comunidad aki. Nos por keda warda te ora e barco pega, es decir cu e Hulandesnan ta bin ‘yuda’ nos. Of nos ta hacie nos mes.