(NLTimes) – Hulanda y varios otro pais miembro di Union Europeo ta trahando riba un carta unda ta urgi e Comision Europeo pa aregla shelter pa solicitantenan di asilo den paisnan cu no ta den e Union Europeo. Nan kier solicitantenan di asilo intercepta mientras nan tabata kier yega Europa ricibi shelter fuera di Europa, NOS a reporta.
E solicitantenan di asilo por aplica pa asilo den Union Europeo pero lo mester keda den e pais unda nan a ser intercepta mientras nan ta warda pa procesa nan aplicacion. Solicitantenan di asilo kendenan a agota tur e recursonan legal tambe por ser acomoda den e paisnan cu no ta Europeo te ora cu nan biahe di regreso keda aregla.
Republica Checo y Dinamarca a inicia e plan aki. E idea ta similar na un acuerdo cu Italia a firma cu Albania den november. Albania, un pais cu no ta miembro di Union Europeo, ta ricibi algun di e solicitantenan di asilo rescata na lama cu gastonan cubri pa Italia mientras cu e autoridadnan na Italia ta procesa nan solicitacion.
E carta tambe a menciona e acuerdo di asilo, implementa ora cu Hulanda a lidera Union Europeo como ehempel. E trato aki ta stipula cu personanan cu crusa for di Turkia pa Grecia “iregularmente” lo ser manda back Turkia al menos cu nan aplica pa asilo na Grecia. Luna pasa, 3 organisacion di ayudo a demanda e estado Hulandes a causa di e trato cu Turkia, nombrando Hulanda como responsabel pa viola “ley Hulandes, Internacional y di Union Europeo pa 3 aña y acusando condicionnan inhumano na Grecia.”
Te ainda no ta cla cua paisnan fuera di e Union Europeo Hulanda y otro paisnan miembro kier pa e Comision Europeo haci e acuerdonan aki cune. E carta no ta contene plannan concreto segun e noticiero.
