Tweede Kamer ta sinti cu gobierno di Hulanda ta subestima e situacion unda Reino (Aruba tambe) por spera un fluho di refugiado Venezolano
Esaki ta e conclusion for di e debate cual a tuma luga e siman aki den parlamento Hulandes riba e situacion. Asina nos partner den noticia Ret Karibense ta informa.
Bon Dia Aruba mes a constata cu den e gobierno Hulandes tin diferente opinion bibando. Manera nos a publica e siman aki tambe. Minister di Asuntonan Exterior Hulandes a declara cu e situacion na Venezuela ta bira mas preocupante. Despues e minister di Defensa Hulandes a bisa cu segun cifranan di Kustwacht di Venezolanonan drentando e islanan Caribense ilegalmente (via boto), e situacion no ta preocupante.
Diaranson a tuma luga un debate den Tweede Kamer riba e topico. Pero atrobe e parlamentarionan ta haya cu gobierno no tin un contesta cla riba e pregunta si Hulanda y e islanan Caribense ta prepara den caso di un fluho grandi di refugiado Venezolano. Durante e debate tambe a sali cla cu no tin proceduranan den caso cu al corto plaso lo wordo confronta cu un fluho di refugiado.
Aña pasa october e parlamento tambe a tene un debate unda a haci e mesun preguntanan na gobierno. Awor Tweede Kamer tin duda si Hulanda realmente ta capabel pa trece e claridad di e situacion andando awor riba e islanan.
Preocupacion grandi pa derechonan humano
Parlamento Hulandes tambe tin preocupacion grandi pa e derechonan humano di e refugiadonan Venezolano. Pa motibo cu e autoridadnan local riba e islanan ta manda Venezolanonan cu a drenta ilegal bek, mientrastanto nan tin derecho di haya asilo. Tabatin hopi preguntanan riba esaki di parti di e parlamentarionan di SP y GroenLinks, pero e ministernan a keda sin contesta nan directo.
Segun minister di Asuntonan di Reino, Ronald Plasterk, e islanan mes ta responsabel pa cumpli cu tratadonan internacional cu ta concerni e tratamento di refugiadonan. Pues no ta cay bou responsabilidad di gobierno Hulandes, segun e minister aki.
Delegacion manda pa investiga
Un delegacion di cuater ministerionan Hulandes a wordo manda pa Aruba, Corsou y Boneiro pa investiga e situacion. Manera Bon Dia Aruba a publica e ta hopi dificil pa haya dato di instancianan gubernamental pa saca afo cuanto Venezolanonan a drenta e isla y cuanto a keda atras. Tambe pa haya sa si nan ta cay bou di e tratado di refugiado.
Aña pasa for di un carta di DOW si a sali afo cu gobierno ta planea un campo destina pa 500 refugiado Venezolano riba e tereno di baseball (riba potret) banda di Cruz Cora na Dakota. Despues no a tende nada mas di e proyecto aki.
