Tweede Kamer, durante un debate general diahuebs cu tres secretario di estado presente, a ripiti su yamada pa reduccion di e costo di bida halto di Caribe Hulandes, y pa elimina burocracia na Saba.

Parlamentarionan presente na e debate di Comite Permanente pa Relacionnan di Reino, cu secretario di estado Raymond Knops di Asuntonan Interno y Relacionnan di Reino, Tamara van Ark di Asuntonan Social y Labor, y Mona Keijzer di Asuntonan Economico y Clima, a bay di acuerdo cu e costo halto di bida, specialmente na St. Eustatius y Saba, mester baha.

A elogia e medidanan di Van Ark pa cu salario, den un intento pa combati pobresa door di mas bienestar social, pension di biehes, y salario minimo. Pero mester mas.

“Ta bon cu bienestar social a subi cu algun decena di dollar, pero esey no ta yuda si hende mester paga tanto pa internet y servicio bancario. Pakico hende na Saba no por djis haci negoshi online cu banco na Hulanda?” a puntra Ronald van Raak di Partido Socialista.

André Bosman di VVD a bisa: “Forsanan di mercado no ta traha cu asina tiki cas. Mester drecha esaki.” Antje Diertens di D66 a agrega cu: “E costo di bida ta absurdamente halto y ta resulta den debe y pobresa.”

Joba van den Berg di CDA a vincula e reduccion di costo di bida y pobresa na un crecemento den autosuficiencia y desaroyo economico door di ataca, por ehempel, e costo halto di internet y electricidad. “Como Reino Hulandes, nos mester por haci un diferencia den e islanan.”

E parlamentarionan tabata di acuerdo cu Caribe Hulandes ta sufri di burocracia Hulandes y e cantidad di regulacion di Den Haag. “E maneho ta mucho cera, mucho tecnico y mucho legal. A perde e aspecto humano”, Bosman a bisa.

E hecho cu cos ta bay malo den e islanan ta culpa di Den Haag, segun Van Raak. El a expresa critica di e hecho cu maneho di permiso laboral ainda no a wordo transferi na Saba, manera a acorda varios aña pasa. Ademas, el a propone crea un areglo special pa Saba, unda e isla no mester adheri na tur regulacion institui pa Den Haag, y lo por tin un decision mas grandi den e maneho di su propio asuntonan. “Saba ta sufri pa burocracia. Duna nan e herment pa haci cos nan mes, y aplica e reglanan unicamente unda ta necesario. Nos no por resolve e asuntonan aki sin RCN, sin ministerio?”

Knops a yama e sugerencia aki ‘un concepto interesante’. El a bisa cu mientras a duna Saba mas responsabilidad, gobierno Hulandes mester cuida cierto otro aspecto, manera politica. El a elogia Saba pa bon maneho, anunciando cu lo firma e Saba Package, un acuerdo administrativo, e berano aki.

Segun Knops, e conseho di Conseho di Estado tocante structura di Caribe Hulandes, cual mester yega pronto, lo ta importante pa evalua politicanan y duna guia con pa organisa miho pa e islanan.

Van Ark a anuncia cu e ta trahando riba un propuesta pa implementa cuido di crèche y tra’i merdia como un facilidad basico, cual no unicamente lo haci nan mas accesibel y pagabel, sino tambe lo ataca ‘backlog’ educacional y cuminda na scol.

Tocante transferencia di autoridad pa maneha permiso di trabou na Saba, Van Ark a bisa cu e ta compronde e deseo di e isla. Sinembargo, e reto ta cu entrega di permiso di trabou ta mara na e permiso di residencia, cual ta cay bou otro autoridad.