Prome minister Hulandes, Mark Rutte ayera a extende e toque de queda pa coronavirus na Hulanda te cu dia 15 di maart, mientras tambe a relaha algun medida di lockdown den loke el a yama un riesgo calcula pa haci e crisis aki, un aña bieu, ‘soportabel’.
“Nos ta na caminda pa temponan miho”, Rutte a bisa e nacion di 17 miyon den un conferencia di prensa televisa nacionalmente.
Rutte a bisa cu studiantenan di scol secundario por bolbe klas pa al menos un dia pa siman cuminsando dia 1 di maart. Educacion vocacional tambe lo ta permiti pa habri back parcialmente, maske universidadnan lo keda cera.
Rutte ta buscando pa alcansa un balans entre controla infeccion mientras tambe ta alivia restriccion na su pais, cansa pa lockdown, cu ta bayendo den un eleccion general dia 17 di maart proximo.
“Nos ta na un momento unda nos mester ta prepara pa tuma un tiki mas riesgo”, el a bisa.
Ademas di reapertura proximo siman di scol secundario y vocacional, salon di beyesa, masahista y hende den otro ‘profesionnan di contacto’ lo wordo permiti pa bay traha back. Lo permiti tur persona menor di 27 aña pa participa den deporte di team pafo for di dia 3 di maart.
Lo permiti bishita hopi limita den tiendanan no esencial si nan haci un cita al menos cuatro ora adelanta.
E relahacion di gobierno toch a laga cantidad di negoshi, manera bar y restaurant, cera te sikiera dia 8 di maart.
Un organisacion umbrella pa industria di catering a bisa cu tin plan pa accion lega contra gobierno pa forsa e reapertura di bar y restaurant y busca compensacion pa revenue perdi ademas di e ayudo estatal cu nan ta ricibiendo caba.
Hulanda ta entre e paisnan Europeo purbando di busca un forma pa sali di lockdown di coronavirus mientras ta bay dilanti cu campañanan di vacunacion y purba di preveni variantenan nobo, mas contagioso, di agilisa nan paso.
Rutte a anuncia e cambionan na e lockdown despues cu e instituto di salubridad publico di e pais RIVM a anuncia cu infeccionnan confirma cu coronavirus a aumenta casi 19% durante ultimo siman mientras mas hende a haci test despues di un siman di clima freeze.
E porcentahe di test positivo den loke e instituto a yama un ‘tercer ola’ di infeccion a reduci levemente, di 11.5% na 9.8%.
RIVM a credita e lockdown pisa y e toque de queda pa e reduccion di infeccion alrededor di 10% desde dia 23 di januari.
“Pasobra mayoria di e poblacion ainda no a wordo vacuna, ta hopi importante pa preveni infeccion lo mas posibel y tene e tercer ola aki lo mas abao posibel”, RIVM a bisa. “Esaki ta posibel solamente si un relahacion (di e lockdown) ta tuma luga cu gran precaucion paso pa paso.”
Mas di 15,300 persona ta confirma di a muri di Covid-19 na Hulanda.
