Ayera, manera diferente medio di comunicacion internacional a publica, Conseho di Europa a anuncia cu Hulanda a reconoce Papiamento como un lenguahe minoritario Europeo.
Segun e portal neerlandistiek.nl, Hulanda a reconoce Papiamento, como tambe Frisio, bao di Deel III di e Carta Europeo pa Idioma Regional of Idioma di Minoria. Esey a ser anuncia ayera door di e Conseho di Europa. Cu esaki ta bin mas posibilidad (legal) y financiamento pa mantene y usa Papiamento.
Segun e portal a indica, cu Deel III, tin un trayecto cu ta wordo inicia pa gobiernonan ariba nivel nacional y Boneriano pa fomenta e uso di e idioma Papiamento na Boneiro den enseñansa y medio di comunicacion, den gobernacion y den e comunidad en general.
A pesar cu Aruba y Corsou tambe ta islanan cu ta papia Papiamento, e reconocemento bao di Deel III di e Carta pa Papiamento ta conta solamente pa Boneiro. E portal ta indica cu Boneiro tin 24.000 habitante, di cual alrededor di 8.000 solamente ta papia Papiamento, segun calculacionnan. Na e parti Europeo di Reino, posiblemente alrededor di 60.000 persona ta papia Papiamento y e idioma ta keda proteha automaticamente bao di Deel II di e Carta.
E reconocemento pa Papiamento ta sucede na un momento unda e provincia di Limburg ta evalua un plan di idioma nobo y ta pidiendo un reconocemento bao di Deel III pa Limburgs. Limburgs tin reconocemento manera idioma regional desde 1997 bao di Deel II di e Carta.
Sinembargo, Conseho di Europa a adverti Hulanda aña pasa tocante e falta di un plan di idioma pa Limburgs y e diputado Kuntzelaers a admiti recientemente cu gobernacion a stop di cumpli cu nan responsabilidad pa Limburgs durante e ultimo 25 aña.
