(CuracaoChronicle) – Hulanda ta negociando constantemente cu otro paisnan tocante tratadonan di impuesto (nobo). E resumen publica cada kwartaal pa Ministerio di Asuntonan Exterior ta lista e paisnan cu cual tin negociacion andando actualmente.
Un tratado di impuesto ta un acuerdo entre dos pais. E proposito di un tratado di impuesto ta pa preveni cu ciudadano- y negoshinan ta paga impuesto riba e mesun entrada na dos pais. Un segundo proposito di tratado di impuesto ta pa yuda preveni evasion di impuesto.
E mensahe aki ta indica cu cua paisnan Hulanda tin intencion di negocia na 2021. E curso eventual di e negociacionnan claro tambe lo depende riba cooperacion cu e paisnan aki, e concurencia di varios negociacion, y e desaroyo di e pandemia di Covid-19.
Na 2021, Hulanda lo purba continua negociacion cu Andorra, Bangladesh, Belgica, Brazil, Maroco, Mozambique, Uganda, Portugal, Rusia, Senegal y Sri Lanka. Hulanda tambe lo purba cuminsa di nobo negociacionnan cu Bahrain, Barbados, Moldova, Emiratonan Arabe Uni (amienda di tratadonan existente) y Ecuador (cu cual no tin tratado existente).
Dentro di Reino, Hulanda lo continua discusion riba un schema di impuesto nobo cu Aruba y Corsou na 2021. Ademas, Hulanda tin intencion di cuminsa discusion tocante e schema di impuesto cu St. Maarten.
Compania- y ciudadanonan cu tin informacion di impuesto cu por ta importante pa e negociacionnan actual of proponi ta invita pa tuma contacto cu Ministerio di Finanzas por escrito (Departamento di Impuesto di Asunto Internacional y Consumo, Departamento di Asuntonan Internacional, PO Box 20201, 2500EE Den Haag). E ministerio por e ora ey inclui e informacion aki den e negociacionnan. Den bista di e posibel negociacionnan pa proximo añanan, informacion riba asuntonan di impuesto dobel cu paisnan otro cu esnan menciona ariba tambe ta bon bini.
