Nos ta tende voznan preocupa for di Hulanda. Ta kico nos ta bay haci cu placa di gas y petroleo, cu lo haya, eventualmente, den e lama rond di nos isla? Nos ta bay gasta esey den e pos sin fondo cu yama presupuesto di gobierno? Of nos ta uza esaki nan un manera sensato pa baha nos debenan astronomico?

E preocupacion, expresa entre otro pa nos amigo Andre Bosman di VVD, ta zona sincero. No cu esey ta haci un diferencia, pasobra ora mester evalua e expresionnan riba nan balor real, loke ta conta ta literalmente loke bo ta bisa, y nada mas. Pues, kico nos ta bay haci cu e placa ey? Berdad ta cu nos no ta corda drechi ta ken a cuminsa cu e discusion aki, cu ta algo tipico cu ta surgi ora cu net placa ta scars. Manera e choller cu ta soña cu e ta rico y ta purba imagina e yate super luhoso cu e ta bay cumpra pa subi lama grandi. Pero esey no ta realidad.

Pa tur esunnan cu ta discuti, arma cu motibo noble, kico nos por/mester haci cu e placa aki, ta conta na prome luga e dicho Hulandes “men moet de huid niet verkopen voordat de beer geschoten is.’ Y mata e beer den e asunto aki ta bastante complica. Pa cuminsa, no a ni haci ainda un prome perforacion di prueba, cu ta duna dato cu por bay analisa. E analisis ey so caba lo hiba nos probablemente den aña 2019, si e perforacion tuma luga dentro di poco.

Si acaso mes haya resultado prometedor, nos ta sigur 5 aña aleha di e momento cu por tin un plataforma instala, y tin produccion di petroleo y/o gas, cu cierto beneficio. Cuanto e produccion ta y por lo tanto cuanto e suma por ta cu gobierno di Aruba ta haya, ta un cuestion cu no tin contesta na Aruba, pero por ta cu Maria Lionza o otro fenomeno den e categoria ey lo por yuda esunnan cu ta kere den e cosnan ey. Pa esunnan entre nos cu ta desea di mantene e discusion mas na nivel di ciencia, ta mas cu cla cu henter e discusion aki no ta ni cay den e categoria ‘soñar no cuesta nada’ pasobra e ta costa tempo valioso di hende cu supuestamente tin otro cos di haci.

Realmente, nos a keda decepciona cu nos prome minister a reacciona riba e asunto aki, bisando cu si ta pa e dicidi, e ta kere cu e placa aki mester bay den un fondo separa, pa mañan. Den bon tradicion Arubano, cu cual hopi di nos no ta cumpli, gobierno sigur cu no: “traha dam, warda awa.” Riba su mes e idea aki tin su merito, tin otro pais caba cu a haci exactamente esey, manera Noruega, cu a crea un fondo impresionante pa su ciudadanonan di mañan. Pero e ora nos mester puntra nos mes si, unda Noruega tabata para financiero y economicamente, ora nan a cuminsa haya e entradanan fabuloso aki di e petroleo y gas den lama di Norte. Compara cu un siglo pasa, cu Noruega tabata un pais relativamente pober, pero no mal organisa ni mal goberna, e rikesa enorme cu nan a haya a haci un diferencia grandi. Mientras e poblacion a redobla den un siglo, nan GDP a bira 25 biaha mas grandi… anto e ora bo tin placa pa pone un banda y lo bo ta loco pa gasta tur cos.

Un mirada awor riba nos situacion. Nos no ta pober, pero si mal goberna, loke a crea debenan astronomico cu no por keda asina. Un tiki biento malo y nos ta bolter, na modo di papia. Lo no ta logico pa nos clear gran parti di nos debenan, prome cu nos pensa riba warda placa? Di mes e ora nos ta baha e interes cu nos ta pagando te na un suma rasonabel y ta haya recurso liber pa paga otro cos. Pues den e asunto aki no ta cuestion di laga hende hinca nos den un discusion robes; tanto prome minister como Bosman tin algo di rason, y si cualkier dia e soño bira realidad, ta mas cu obvio ta con nos mester actua.

Pero aunke soña no ta costa nada, soña cu algun dia nos ta bira e segundo Noruega di e mundo aki no ta asina util. Pero si nos kier siña di e manera racional, eficaz y cu gran vision con nan a organisa nan pais te dia di awe, ta recomendabel sin mas di tuma nota di kico nan a haci, con nan a haci. Por ta cu di esey nos por siña hopi, hasta si nunca e soño bira realidad. Nos por siña di nan, cu ora cu nan a topa cu e enorme suerte di descubri tanto petroleo, nan tabatin e cultura di bon gobernacion caba, pa sa di uza e placa cu tabata drenta pa e cosnan corecto.

Podise nos dia di gloria di petroleo nunca lo yega, pero e dia di gloria di goberna nos pais na un manera drechi, esey si ta den nos man.