Entrante 1 di januari 2020, e no lo ta posibel pa sigui haci tour cu turista den e asina yama ‘Red-Light District’ na Hulanda, cual ta un caya unda ta promove prostitucion. E ciudad di Amsterdam ta masha conoci pa esaki.
E vice-burgermeester di Amsterdam, Udo Kock, kende a propone e proyecto di ley aki ta bisa cu nan ta haya ‘inapropia cu turistanan ta mira di forma lascivo (cu deseonan sexual) e trahadonan sexual. E tin un precupacion grandi na e manera con ta expone e personanan aki como un atraccion turistico.
Ciudadanonan di Amsterdam tin basta tempo caba ta keha riba e aumento drastico di hende cu ta cana riba caya y ya caba tabata tin medidanan cu a ser tuma, unda cu un compania di tour mester tin permiso legal y por bay cu maximo 20 persosna cada biaha den e area.
E gobierno Hulandes a duna e fecha di 1 di januari 2020 pa asina duna e oportunidad y tempo suficiente pa companianan exsistente stop cu e actividadnan aki. Algun tour operator ta contento cu e decision y ta bisa cu esaki ta habri caminda pa un discusion sano di e manera con ta trata hende manera un obheto. Otro operatornan ta di opinion cu e decision lo afecta e economia di e ciudad fuertemente, prinicipalmente e zona ey y su alrededornan. Na aña 2017 mas cu 42 miyon persona a bishita Hulanda di cual un gran cantidad tabata specificamente pa bay un koffie-shop y tambe Red-Light District.
