Hulanda ta bolbe yega semi final despues di a derota e ekipo Cubano cu score di 14-1 den 7 inning, terminando cu un record di 2-1 den Pool E.
Cu Hapon su victoria di 8-3 riba Israel, Hulanda ta avansa pa e round final otro siman, cual lo wordo hunga na Dodger Stadium. Wladimir Balentien a dal 2 homerun cual a dun’e 5 RBI. Jurickson Profar a bati 3 hit, mientras cu e pitcher Diegomar Markwell a permiti solamente un careda den 6 inning. Den e prome round, Hulanda a anota 11 careda den 3 wega, y nan a sigui e prestacion aki anotando 32 careda total den Pool E.
E ekipo Cubano tabata sub campeon den World Baseball Classic na 2006, despues di a perde contra Hapon den final. Pero e ekipo Cubano no ta mesun fuerte cu e tempo ey, debi na hungadonan cu a bandona e pais pa bay hunga den MLB, y e aña aki e ekipo a perde tur 3 wega den di 2 round.
Manager di e ekipo Hulandes Hensley Meulens a reacciona bisando: “No ta un secreto mas. E hungadonan aki a proba cu nan ta strea di Major League. Cu speransa nos por gana dos wega mas.”
