DEN HAAG – Hulanda y 6 otro pais miembro di Union Europeo ta opone plannan Frances Aleman pa un presupuesto pa eurozone.
Esaki mester costa hopi menos segun e paisnan den un declaracion conhunto. E presupuesto di eurozone ta bini originalmente di presidente Frances Macron cu despues a haya sosten di canciyer Aleman Angela Merkel.
E plan tin hopi resistencia for di grupo di paisnan Europeo di Norte (Hanzegroep). Ta trata di Hulanda, Irlanda, Dinamarca, Suisa, Finlandia, Letland y Litouwen. Na december a palabra cu ta bini cu e presupuesto di Eurozone pero limita. E presupuesto lo keda financia solamente cu medionan existente y no por wordo uza pa saca otro paisnan for di problema pero si pa haci paisnan mas competente. Ademas no por yam’e presupuesto mas. E ta un instrumento. Na februari Alemania y Francia a bini hunto cu un plan mas detaya den cual paisnan ta habri porta pa impuestonan apart pa financia e instrumento.
Mescos cu den december e grupo ta pone den un carta cu no ta di acuerdo cu proposicionnan di e Comision, Francia y Alemania. E 22 biyon euro cu ta reserva pa e instrumento den presupuesto di Union Europeo mester baha segun minister di Fiansa Hulandes Hoekstra y su coleganan Europeo. Ademas e paisnan ta bisa cu nan no ta di acuerdo cu impuestonan special pasobra impuesto ta competencia di cada pais miembro. Pasobra mester financia e presupuesto di Eurozone for di Union Europeo e instrumento ta parti di negociacionnan di e kader nobo MFK, presupuesto di mas aña di Union Europeo. Paisnan mester vota unanimamente pa e presupuesto 2021-2027.
