Hulanda ta mustra huña… Y kico Aruba tin…?

Ora nos a kere cu sorpresa a caba pa e siman aki, tabata turno pa gobierno Hulandes pa mustra cu nan tambe ta bon den e categoria aki. Tanto di secretario di estado Knops como di premier Rutte a bin un contesta inconfundible riba e noticia di gobierno di Aruba no ta bay di acuerdo cu e proposicion di Hulanda pa haya ayudo financiero. Rutte a bisa claramente cu no ta negocia e proposicion di su gobierno, ta tuma e proposicion manera e ta o no ta haci esey, y e consecuencianan ta pa gobierno di e islanan.

Asina aparentemente ta yega un fin na e negociacionnan entre gobierno di Aruba y di Hulanda, aunke por bien compara e relacion entre nan cu un matrimonio, unda ta zundra y ta cana bay, pero finalmente di ambos banda nan sa masha bon cu lo mester sigui papia. Banda di e realidad ey, ta keda existi naturalmente e otro cu ta cu Hulanda tin hopi mas poder y instrumento pa tira den e pelea, si ta di esey ta trata. Y esey ta loke nos por a ripara riba e dia cu supuestamente lo a tuma decision den Conseho di Ministro di Reino, loke atrobe a keda posterga. Y pa bisa berdad, realmente nada no a cambia desde e promer dia cu e crisis na e islanan a presenta: Hulanda tin reserva financiero grandi, fruto di nan propio esfuerzo, cu nan por scoge pa yuda nos. Di otro banda nos ta papia aki di tres isla cu no tin nada di reserva. Unico cos cu nos tin, ta debe, anto cuanto. Mientras ta berdad cu normalmente e aña aki lo a pone paso importante pa cuminza limita deficit y pasa pa un surplus modera, tambe ta berdad cu no tabata mira señal di algun voluntad pa cuminza baha gasto di personal. Pero, Covid-19 a bin y nos no sa si e tin fecha pa bay; por ta cu el a bin pa keda, sigur si nos mira e situacion cu a surgi den ultimo luna, cu no por a conta cu e medidanan contundente pa para esey. Den nos edicion di awe un grito di auxilio di hospital pa tur ciudadano haci loke nan mester haci pa para e virus aki. Y nan tin razon, sin nos aporte e cos aki no ta bay logra nunca.

Pero, pa bolbe na e asunto financiero, nos no por resolve e asunto aki riba nos mes, y nos no por fia asina hopi placa tampoco for di otro fuente cu no ta gobierno Hulandes. Manera nos a formula caba den nos Editorial di ayera, nos por pospone e momento cu nos ta bolbe cerca nan pa firma e acuerdo, e por dura un par di luna mas, pero no tin otro ruta pa sali di e cataclismo unda cu 34 aña di gobernacion pesimo a pone nos. Awor, nos gobierno a bin cu e sabiduria cu ta bay fia placa cerca otro proveedor, pero esaki a haya un contesta di banda Hulandes caba: dia bin busca placa cerca nan, nan ta kita e suma cu a fia otro caminda, pasobra bo no por pidi placa dos biaha pa mesun cos… Y cu e negociacion cancela, lo no tin avance tampoco, ni riba e detayenan cu eventualmente a keda riba mesa. Ora bolbe na mesa, lo ta pa firma, punto. Pa colmo, prestamo internacional mester di aprobacion di gobierno di Reino. E promer anuncio di nos Promer Ministro tabata cu ta trata di un prestamo asina, lantando e pregunta si tabatin permiso caba o cu ainda esey lo mester a bay busca. Despues, segun algun medio, e storia a cambia cu ta trata di un prestamo local, cu no mester tal permiso. Nos ta warda trankilamente pa nos haya sa kico ta berdad y kico no.

Di tur manera, nos ta spera un splicacion debido di nos promer mandatario, cu no sa duna un dscurso sin menciona e palabra magico ‘transparencia’ y esey por fabor pa tur medio. Nos no a aprecia cu ayera, un dia importante pa nos tur, no tabata posible pa haya reaccion di Promer Ministro riba e golpi fuerte di gobierno Hulandes, pero si ta observa cu e ta duna entrevista extenso na un medio unda e ta sinti su mes comodo. Esey no ta manera mester ta, gobierno mester duna cara na tur medio, y si bo no kier atende nan un pa un, ta p’esey tin rueda di prensa.

En todo caso, gobierno di Hulanda si tabatin su contesta cla ora a bin e noticia cu Aruba no ta firma. Tempo ta di nan banda y nan ta warda te dia nos bolbe, ‘met hangende pootjes’. Cu tur esaki, unda nos ta bay den e tempo nos dilanti? Nos por keda keto y contento cu tin placa por lo pronto pa paga e compromisonan directo. Y despues? Aki dos luna por tin un economia na werki, salud na werki, y sin caminda di sconde… E lema di Promer Ministro cu e no ta laga Aruba kibra por bira un promesa hopi caro, sigur si e ta keda cana tras di e fanaticonan di autonomia den su partido, cu ta grita pero no tin solucion. Hulanda a mustra su huñanan, y nos, kico nos tin?