(NLTimes) – Hulanda, Merca y Hapon a yega un acuerdo tocante restriccionnan riba exportacion di chipnan di tecnologia na China. E paisnan a keda di acuerdo na Washington pa restringi e benta di algun ekipo pa fabrica semiconductor na e pais Asiatico, Bloomberg su agencia di noticia a reporta.

Gobierno di Merca tin hopi tempo cu intencion di pone restriccion na benta di tecnologia di chip di tecnologia halto na China pa preveni e pais for di usa su chipnan avansa pa crea armanan cada biaha mas sofistica. Pa causa di esaki, President Joe Biden su administracion ta specificamente mirando den direccion di Hulanda, pa motibo cu e ciudad Hulandes Veldhoven ta cas di e creador di chip ASML. E compania basa na Hulanda a bira un lider mundial den e desaroyo di mashinnan pa fabricacion di chip. Hapon tambe tin un compania importante den e cadena di produccion di chip cu Nikon.

Sinembargo, e lo por tuma lunanan prome cu por implementa e acuerdonan aki. Y e paisnan tin mester di e tempo aki pa legalisa e acuerdo, fuentenan cercano a conta Bloomberg.

Bao presion di Merca, Hulanda a blokia e benta di ASML su mashinnan conoci como EUV Machine pa China. Sinembargo Merca tambe kier pa e “generacion bieu”, e mashinnan DUV, pa stop bay na companianan Chino. Esaki ta pa motibo cu ya caba tin suficiente di esaki na China.

Hulanda awo aparentemente a keda di acuerdo pa blokia e benta di e benta di algun di e versionnan di e mashinnan DUV. Un vocero di e cas blanco a nenga duna comentario na e preguntanan di bloomberg. E ministerio Hulandes di Buitenlandse Zaken tmabe no kier a comenta riba e reportahenan.

Minister Liesje Schreinemacher anteriormente a declara cu tabatin dialogo entre e lidernan tecnologico. E paisnan den negociacion tambe kier evita demasiado dependencia riba China pa chipnan. Ademas, Merca y Hulanda tambe kier preveni cu e chipnan avansa por ser usa den armanan pa paisnan manera China. Sinembargo Hulanda no a simplemente cumpli cu Merca su peticionnan, e Minister a enfatisa.

Sinembargo e gabinete tabatin duda pa anuncia e detaye di e acuerdonan cu Merca y Hapon, Prome Minister Mark rutte a bisa. “E pregunta ta si algo lo sali for di esaki, y si esaki lo ta hopi visibel,” el a comenta na su conferencia di prensa semanal.

ASML no ta dunando comentario actualmente. Anteriormente e siman aki, hefe ehecutivo Peter Wennink a adverti cu restriccionnan sumamente estricto por haci chipnan hopi mas caro y escaso. Ademas, el a expresa menos preocupacion tocante ASML perdiendo den e mercado Chino, bisando cu demanda pa ASML den otro partinan di e mundo por yuda cu e perdida aki.