Prome minister Hulandes, Mark Rutte a extende casi tur di e medidanan di lockdown pisa na su pais ayera pa sikiera un luna mas, bisando cu e transmision rapido di e variantenan mas contagioso a haci e decision aki inevitabel.
Un toque de queda imponi 10 dia pasa, cu a duna impulso na disturbionan amplio durante su prome dianan, lo keda na vigor, Rutte a bisa. El a bisa cu gobierno mester evalua e opcionnan di lockdown atrobe cuminsamento di proximo siman.
E premier a papia algun ora prome cu instituto di salubridad publico RIVM a bisa cu e infeccionnan nobo di coronavirus a reduci cu 20% durante ultimo siman, pero e variantenan mas contagioso, en particular esun identifica pa prome biaha na sur di Inglatera, awo ta conta pa dos tercio di infeccion na Hulanda.
Rutte a bisa cu infeccion ta reduciendo ‘poco poco pero sigur’, pero a sigui adverti cu ‘tur calculacion ta punta riba un tercer ola cu ta parce di ta descendiendo inevitablemente riba nos, e causa principal di cual ta e variante Britanico di coronavirus’.
RIVM a bisa cu infeccionnan nobo a reduci na 28,628, pero a urgi ‘e precaucion mas grandi posibel’ den cualkier relahacion di e lockdown.
Rutte a scucha e conseho.
Su coalicion gobernante ‘a yega na e conclusion cu extende e lockdown actual casi den su totalidad te dia 2 di maart ta inevitabel’, el a bisa.
Bar y restaurant na Hulanda ta cera desde mita di october, y tiendanan no-esencial desde mita di december. Sitionan publico manera cinema, museo y biblioteca tambe ta keda cera y tin limitenan estricto riba e tamaño di gruponan (samenscholing) tanto paden como pafo.
E prome relahacion di e lockdown e aña aki a yega diadomingo, na momento cu gobierno a anuncia cu scol basico y crèche por habri back dialuna proximo. Rutte a bisa cu scol secundario ta keda cera te sikiera dia 1 di maart.
Den otro alivio menor na e lockdown, Rutte a bisa cu for di dia 10 di februari proximo tur tienda lo ser permiti pa bende nan producto y clientenan por colecta esaki na puntonan di pickup pafo di e tienda.
RIVM a bisa cu e reduccion den infeccion siman pasa tabata un resultado di e lockdown, pero ta mucho trempan pa bisa ki efecto e medida di toque de queda tabatin na e pais desde cu el a drenta na vigor dia 23 di januari ultimo. Hulanda e siman aki a registra e aumento diario di infeccion di mas abao desde fin di september.
RIVM a bisa cu ‘sin e variantenan mas contagioso, e situacion lo ta bayendo den bon direccion’ pero a adverti cu ‘por relaha e medidanan solamente cu e precaucion di mas grandi posibel’.
E total cantidad di morto na Hulanda den e pandemia ta mas di 14,100 persona.
