(NLTimes) – Den ultimo decada, Hulanda a expulsa al menos tres consul di embahada Sudanes na Den Haag, despues cu a resulta cu nan ta traha pa servicio di inteligencia y seguridad Sudanes, NISS, segun NRC a reporta basa riba su propio investigacion.
A acusa e tres consul di monitor y intimida miembronan di oposicion Sudanes cu a huy na Hulanda, segun e corant. Hulanda a solicita pa nan bandona e pais entre 2012 y 2019. Al menos un solicitud tabata basa riba informacion di servicio di inteligencia Hulandes, AVID.
Ministerio di Relacionnan Exterior a confirma cu a solicita pa un consul bandona Hulanda na 2016. E ministerio a bisa NRC cu na juli 2016, su director general pa asuntonan politico di forma oral a solicita pa e embahador Sudanes e tempo ey despedi e consul, pa motibo di su trabao cu NISS. Den e combersacion aki, e director general a referi na dos caso anterior, segun e corant.
E consul en cuestion a bandona su puesto na Hulanda dos aña despues di e solicitud di e ministerio. Relacionnan Exterior a bisa NRC cu e embahada Sudanes a priminti cu e consul lo stop su actividadnan cu NISS, asina ‘eliminando e motibo pa mas presion’.
Den ultimo shete aña tabatin varios reporte cu NISS ta detene y tortura solicitantenan di asilo Sudanes cu a wordo deporta back na Sudan. A pesar di esaki, y e hecho cu Hulanda tabata sa di al menos tres consul cu tabata traha pa NISS, e politica Hulandes ainda ta pa manda solicitantenan di asilo fracasa na e embahada Sudanes na Den Haag, segun NRC.
Personanan Hulandes-Sudanes repetidamente a adverti ministerio di Relacionnan Exterior cu agentenan di NISS tabata trahando na embahada Sudanes na Den Haag durante ultimo decada, substanciando nan advertencia cu potretnan di consulnan sacando potret y obstruyendo rally di oposicion y manifestacionnan, e corant a reporta. Ora NRC a puntra e ministerio tocante esaki, a contesta cu e ministerio di Relacionnan Exterior ta inclui ‘documentonan y informacion di comunidad Sudanes’ den consideracionnan di politica.
