Ayera Rey Willem Alexander a yega St. Maarten hunto cu minister Hulandes encarga cu Asuntonan di Reino, Ronald Plasterk pa mustra nan sosten.
E Rey a bishita diferente luga, entre otro e shelter mas grandi y tambe e hospital, segun Ret Karibense. Segun De Telegraaf e Rey a expresa cu esaki ‘niun hende por imagina’ y ‘tur caminda bo ta wak e destruccion’.
Banda di Hulanda mes, Union Europeo tambe ta duna 2 miyon euro pa yuda alivia e paisnan Caribense. Sinembargo nan ta consciente cu mester hopi mas placa riba termino largo. Tin critica riba esaki y tambe riba e suma cu Hulanda ta duna. Esaki den contexto cu prome minister di St. Maarten William Marlin a indica cu mester sigur 1 biyon dollar pa restaura e pais. Otro critica ta cu ta haya cu Francia a yuda ma lihe y cu un forsa militar mas grandi pa preserva siguridad. Na e parti Hulandes e militarnan lo yega awe na un 550 total y na e parti Frances esaki lo ta mas cu 2000.
For di Aruba prome minister Mike Eman ta informa cu a logra reestablece e conexion aereo bek cu St. Maarten pa asina trece ‘nos hendenan’ bek tambe. E prome vuelonan a yega ayera atardi. Despues cu fin di siman pasa pashentnan cu mester ayudo medico ya a yega. E mandatario ta bisa cu nan a ricibi un gran cantidad di peticion di Arubianonan cu ta biba of tabata di bishita na St. Maarten y a keda hopi traumatisa of afecta y kier sali di St. Maarten pa regresa Aruba.
Nan mester bay aeropuerto di St. Maarten
“Nos ta trahando basta dia caba y ayera nos a logra cu algun famia por a sali cu avionnan priva. Awo reestableciendo e conexion aereo comercial, tur esnan cu ta preocupa y kier pa nan famia bin, ta importante pa bisa nan cu mester bay aeropuerto pa haci e diligencia pa sigura luga riba e avion.”
Dialuna atardi a yega e dos prome vuelo comercial directamente for di St. Maarten cu Copa Airlines.
Ta bon pa tene na cuenta cu comunicacion na St. Maarten ainda no ta canando bon y, por ehempel, e oficinanan caminda normalmente por a regla pasashi, ainda no ta traha; pues mester bay directamente na aeropuerto di St. Maarten pa por regla un salida pa Aruba, e prome minister ta enfatisa: “Nos ta haciendo e mas conoci, pa esnan cu kier bin, por bay aeropuerto y asina cu tin notificacion di otro vuelo comercial, nos lo haci esaki publico.”
Prome minister y Comision di Calamidad di Aruba ta bay keda monitor si e prome reestablecemento di conexion aereo comercial ta suficiente. Segun e demanda di pasaheronan, como tambe di urgencia medico eventual, ta evalua e inclusion di vuelonan charter y/of di Defensa Hulandes. “Un bes cu tin miho clearance di e runway y su operacion, e cantidad di vuelonan comercial lo aumenta pa asina tur hende cu kier regresa Aruba, por regresa Aruba”, sr. Eman ta indica.
