Mientras cu recientemente Minister Presidente Wever-Croes a duna di conoce cu Aruba lo a pidi y ta spera di haya Afl. 12 miyon di ayudo di Hulanda, parti di e 23,8 miyon euro cu gobierno di Hulanda a anuncia na luna di mei di e aña aki, ta resulta for di un carta di Secretario di Estado Raymond Knops na Tweede Kamer, cu decision encuanto e reparticion di e suma entre e islanan Aruba, Bonaire y Curaçao lo tuma luga despues di e actual reces.
Den un carta manda pa Tweede Kamer fecha 3 di juli 2019 Knops ta informa parlamento cu gobierno Hulandes a tuma e decision den su ‘Voorjaarsnota’, mirando e situacion na Venezuela, pa reserva 23,8 miyon euro como ‘aanvullende post ‘ na Ministerio di Finanzas, pa por atende e peticionnan pa ayudo di Aruba y Curaçao. Ministerio di Asunto di Interior y di Reino lo coordina e uzo di e recursonan aki. E apoyo segun e carta lo ser duna mas tanto posibel di manera ekitativo y ‘na midi’ conforme e peticionnan haci pa e dos islanan. E recursonan extra aki ta destina en todo caso na fortificacion di e frontera maritimo di Aruba, Bonaire y Curaçao, y pa duna asistencia adicional pa optimalisa e procesonan pa cu stranhero na Aruba y Curaçao. Tocante e destinacion exacto di e recursonan segun Knops tabata hibando deliberacion cu e islanan na momento di skirbi e carta (3 juli 2019).
Ora e gabinete (Hulandes) caba di tuma e decisionnan necesario lo informa Parlamento tocante esaki, despues di tuma decision na augustus, e carta ta bisa finalmente.
Nota di redaccion
E carta di Secretario di Estado Knops ta duna di conoce cu ainda no tabatin un decision di banda di Hulanda kico y cuanto e apoyo pa cada pais lo ta, esey na momento di skirbi e carta. Supuestamente e deliberacion a tuma luga o ta tumando luga ainda. E decision final por spera den curso di e luna venidero. Tambe e carta no ta laga luga pa duda cu e recursonan disponibel lo ta pa fortifica frontera y pa procesonan administrativo relaciona cu stranhero. No tin mencion di ningun otro obhetivo na cual lo por destina e fondonan.
