Cu un hattrick di Georgino Wijnaldum y dos otro anotacion, di debutante Myron Boadu y Nathan Aké, Hulanda no a laga nada na casualidad den e ultimo partido di e buelta di clasificacion pa e Campeonato Europeo 2020 di UEFA: 5-0.
E team di coach Ronald Koeman no tabatin ningun problema cu e team di Estonia. Wijnaldum y Aké a habri score tempran den e partido caba y despues di apenas 20 minuut ya tabatin un bentaha comodo riba scoreboard: 2-0. Otro debutante den e team Hulandes tabata Calvin Stengs di AZ, cu a laga un bon impresion atras. Na comienso Stengs no tabata mustra comodo ainda pero mas den e partido el a pone portero di Estonia den problema cu un tiro peligroso.
Hulanda tabata haci mas tanto uzo di banda drecho den atake unda Stengs tabata move bay paden y e defensa di sorpresa, Quincy Promes tabata subi pa causa confusion pa Estonia. Promes a proba cu e ta capaz di hunga na varios posicion, el a yega di hunga riba e posicion ey caba pa Hulanda. Esaki a haci e pregunta surgi kico lo bay pasa na e posicion di defensa banda drechi, unda tanto Joel Veltman y Denzel Dumfries ta candidato tambe, pero ta parce cu Koeman te awor no ta convenci di nan prestacionnan. Esey lo keda un problema pa despues ora den e campeonato Europeo Hulanda tin tres partido den e fase di grupo inicial pa hunga na cas.
E team Hulandes a haci un gesto contra racismo tambe durante e partido, como reaccion riba e accion racista diadomingo contra Ahmad Mendes Moreira den e partido di FC Den Bosch contra Excelsior. Despues di e prome gol di Wijnaldum e ekipo completo a bay dilanti tribuna unda Wijnaldum y Frenkie de Jong a mustra e publico nan brasa: color di cuero no ta relevante…
