Minister Presidente a splica cu e expresion cu el a yega di haci, cu “Hulanda su proposicion lo kibra Aruba”, e kiermen cu e lo kibr’e no den sentido institucional, sino financiero, a pesar cu nan ta ofrece prestamo atractivo di cero interes.

E mandatario no a referi cu institucionalmente Hulanda lo kibra Aruba, pasobra gobierno ta di acuerdo cu un 80% di e landspakket, ya cu mayoria di e reforma aki, nan tine den nan master plan. Mientras cu un 20% nan lo mir’e a base di e negociacion, con lo hinca den dje. “Mi no tin problema cu esey,” el a declara.

Pero si e ta mira cu Hulanda su posicion lo kibra nos financieramente, no pa e prestamo. Sino mas tanto e proposicion inclui den e Rijkswet Financieel Toezicht (RFT). Ya cu tin algun detaye den e pakete cu na Aruba no ta funciona, el a reitera.

E mandatario a bisa cu un gran parti di aspecto financiero a wordo saca afo, ya cu Hulanda a ripara cu nan no ta traha pa Aruba. Sinembargo recientemente Hulanda a hinca algun ‘cos scondi’ den e pakete cu nan mester papia di dje atrobe, segun Wever-Croes.

Negociacion

Di otro banda, mientras cu gobierno ta sigura cu ta den negociacion cu Hulanda via Secretario di Estado, Raymonds Knops, diabierna ultimo Minister President di Hulanda, Mark Rutte a bisa medionan di comunicacion cu no tin negociacion. Pues e ta haya cu un propuesta Hulanda tin pa Aruba, ya sea cu nos ta acepta of no, pa otorga ayudo financiero.

Premier Wever-Croes ta haya cu ora ta pone e dos mandatario Hulandes aki banda di otro, ‘nan ta mas bruha cu un bol di hilo.’ A pesar di esey, e ta kere cu e antagonismo aki por duna nos un indicacion. Ya cu den pasado prensa a referi cu no tin negociacion, y el a tuma contact mesora cu Hulanda y Knops a bis’e: “Nos ta na mesa y nos ta papiando toch.”

E hecho cu e version di e documentonan di e acuerdo aworaki compara cu e prome version ta mustra cu tin cambio –segun e mandatario – ya esey ta un indicacion of prueba cu nan ta den negociacion. El a agrega cu Knops a ricibi e documento aki diabierna ultimo y nan lo atende esaki na nivel di ambtenaar, y e siman aki nan lo sinta cu otro.

Pero considerando e declaracion di Rutte, e no kier yega na e conclusion cu Hulanda ta gaña pais Aruba cu nan ta negociando y nan no ta negocia. El a declara na e matutino aki cu e ta considera importante cu nan ta na mesa. Nan ta papiando tambe nan ta haciendo cierto cambio cu Aruba a pidi nan pa haci. Prome mandatario a reconoce si cu Hulanda no kier haci mucho cambio.

E kier interpreta premier Rutte su palabra cu nan ta bin cu cambio cosmetico, pero no di contenido. Si e ta asina, e mandatario ta considera esaki un problema hopi serio, ya cu practicamente Hulanda ta forsa nos den leynan cu simplemente no ta traha pa Aruba.

E di tres tranche
 Tambe el a referi na e hecho cu nan ta hayando algun reaccion cu gobierno a keda pospone e asunto di firma e acuerdo pa haya e tres tranche di ayudo financiero di Hulanda pa 204 miyon. E posponemento aki a haci cu nos ta perde e dos luna (juli y augustus). Aworaki Hulanda ta papiando cu e di tres tranche ta inclui september, october y november so.

E mandatario ta haya cu e proposicion presenta na luna di juli a wordo traha pa algun ambtenaar na Hulanda cu no sa mes cu Aruba su sistema financiero ta totalmente otro cu esun di Corsou y St. Maarten. Parti di e declaracion aki a wordo divulga durante un entrevista exclusivo cu e mandatario a duna na e matutino aki y cu a keda publica ayera.

Igualmente el a laga sa cu Aruba ta fia riba mercado internacional. Mientras Corsou y St. Marteen no por bay riba mercado internacional, sino via di Hulanda. Y pa haya e fiansa via Hulanda, como pais bo mester cumpli cu e norma. El a splica cu esey Hulanda kier aplica riba nos, y esaki ta un di e motibonan cu ta negocia cu Hulanda.

E ta mas tanto – segun e prome mandatario – riba e detayenan tecnico den e rijkswetnan cu no ta bay funciona na Aruba. Tambe e ta mira cu den e Rijkswet di e entidad (CHE) tambe tin algun detaye cu no ta bay funciona. Pero tambe tin algun deadline cu dificilmente gobierno no lo por keda cla na tempo, aunke nan ta haya un cantidad di ambtenaar.

Aprobacion

El a señala cu independientemente cu e ta firma of no, e acuerdo aki mester bay Parlamento pa su aprobacion, y e ta suheto di bin cu algun cambio den nos organo legislativo. “Mi firma no por stroba un parlamentario di haci su trabao,” el a bisa. E ta haya cu ora cu gobierno tin un ley cu nan sa cu ta traha pa Aruba, e ora nan no tin problema cu e contenido di e ley.

Pero loke tin riba mesa awor ta pa practicamente gobierno haya 204 miyon so. Pasobra loke tin aden, dificilmente gobierno por cumpli cune pa haya posibilidad di mas ayudo financiero for di Hulanda. El a bisa cu e lo firma un acuerdo ora cu e sa cu pais Aruba lo por cumpli cune. “Si nos ta firma awor e barco ta bay pega aki un par di siman atrobe,” el a declara.