Sindicato SEPPA ta condena e hecho cu Hulanda kier impone riba Aruba un pakete di 18 condicion pa asina nos pais por tin acceso na fiansa for di nan.

E sindicato ta reconoce cu pandemia Covid 19 a kibra hopi trabao na mundo, causando un inmenso sufrimento humano y ta laga bon cla e vulnerabilidad extremo di hopi hende, pero tambe negoshinan. E golpi aki Aruba tambe a sintie.

Ta wordo papia di solamente algun condicion di un total di 18. Pero ta importante pa wak –segun SEPPA – e extremo cu e condicionnan aki lo hiba nos pais, kico e ta su consecuencianan y con nos ta wak nos mes den esakinan.

Tambe e sindicato a yega di condena e hecho cu e documento cu ta contene alrededor di 18 condicion a wordo poni inicialmente den “secresia.” No tabatin mucho informacion, no tabatin transparencia y e hende no tabata envolvi. SEPPA ta haya esaki como un eror.

E limitacion di un pais pa dialoga cu su partnernan social, por wordo mira tambe como un exclusion di e representantenan di nos ciudadanonan den e tumamento di decisionnan importante pa pais Aruba. Sigur ora toca problemanan grandi manera loke nos ta aden.

Pa e sindicato esaki ta e causa tambe cu ta hopi dificil defini kico ta loke ta uni nos. No tin informacion, no tin transparencia y e hende no ta envolvi. Pues, por bisa cu no tin construccion di e brug ey pa tur hende yega na otro.

SEPPA ta weita cu preocupacion Aruba a hiba un lucha largo pa nos por a logra e Status Aparte. Y e poco condicionnan mes cu ta keda menciona ta bay toca e lucha di nos lidernan anterior pa un pais liber. Liber pa actua y tuma su propio decisionnan.

E idea pa nos ta un pais autonomo ta tene man cu e hecho di tin nos libertad. Sinembargo for di awo caba nos ta wak cu e forma cu Hulanda kier atende cu nos pais, nos no ta bay ta liber. Pa e sindicato ta bisto cu esnan cu nos ta eligi pa goberna nos pais, den futuro tambe ta bay wordo limita.

Asuntonan importante cu nos ta pone pa nos mes lo no haya e prioridad, y lo ta di acuerdo cu e balor cu otro, pa no bisa Hulanda ta establece. SEPPA ta haci un yamado pa ban reenforsa e comunion fuerte entre moral, e principio di autonomia y e libertad humano.

E sindicato aki ta haya cu awe nos mester bisa Hulanda, cu nos ta di carni weso y espirito, cu nos no ta wordo goberna di modo exclusivo pa leynan di ciencia, mucho menos como mucha manda. Nos mester mustra cu Aruba ta participa den un mundo na unda su ciudadanonan por pensa como un ser liber y cu nos ta capaz pa goberna riba nos mes.

Pero esaki tambe mester pone nos compronde cu mescos cu autonomia ta e capacidad pa controla, afronta y tuma decisionnan propio cu nos mester acepta tambe cu ta nos propio decisionnan como pais ta loke a hinca nos den e situacion actual. Cu a keda empeora mas ainda cu e Covid.

Tambe nos mester acepta cu e manera cu pais Aruba a wordo maneha den nos Status Aparte a bin ta hibando nos pais na un situacion di dependencia. Cada biaha fia placa, modernisa aki y modernisa aya, y scondi ta saca probecho. Ta esaki tabata e situacion prome cu Covid 19 na Aruba. Ta e actitud aki mester caba, segun SEPPA.