Cada aña na Hulanda leynan, regla y tarifa nobo ta wordo introduci na mes momento cu e aña nobo ta cuminsa. Fuente Nos.nl ta reporta cu algun di e cambionan mas importante cu lo cay riba 1 di januari 2018 lo afecta matrimonio, gastonan pa coriente y gasolin, medio ambiente, siguridad, vivienda, labor y enseñansa.

 Pa matrimonio of partnerschap registra un cambio grandi lo encera cu casamento cu bienes comparti no lo ta comun mas. Desde aña nobo lo conta cu pertenencianan y debenan cu a wordo colecta lo keda propiedad di e persona original na cual esaki ta pertenece. Te hasta herencianan ta keda separa, bou ley nobo. Esnan cu lo kier casa cu bienes comparti lo por haci esaki apart por medio di regla esaki cu notaris.

Gastonan mas halto, salario minimo poco mas halto
Gastonan relaciona cu bida diario tambe lo wordo afecta; despues di añas di prijsnan cu a keda baha, segun NOS, e aña nobo lo trece cu ne un cuenta di coriente mas halto. Salario minimo diario alabes lo subi di 72.25 Euro pa 72.83 Euro. Accijns cobra riba gasolin ta hisa cu 0,648 cent, accijns riba diesel cu 0,389 cent y LPG su accijns cu 0,270 cent. Postzegels lo hisa for di nan prijs actual di 78 cent pa 83 cent.

Comestibel tambe lo wordo afecta despues cu Thuisbezorgd.nl ta cuminsa pidi mas comision di e restaurantnan cu ta haci uzo di e servicio aki. Pues e companianan lo posibelmente pasa e gasto aki pa consumido, causando cu pidi cuminda pa deliver na porta di cas lo bira mas caro.

Medio ambiente
Aspectonan di medio ambiente tambe lo mira par di cambio, di cual e prome ta encera cu brommernan y scooternan cu e tipo di motornan cu ta causa mas hopi polucion lo wordo kita for di mercado. E motornan ‘tweetakken’ aki ta wordo reconoci pa nan zonido di click ora di opera. Esnan cu ya caba ta riba mercado por wordo bendi ainda, pero ora esaki caba lo mag di bende brommer y scooternan cu ta cumpli cu e normanan Europeo nobo. Personanan cu brommer y scooter di e tipo aki mag di sigui core esaki manera normal si no ta core den ‘milieuzones’.

Siguridad
Cambionan cu lo afecta personanan den contacto cu cadena hudicial lo encera entrante aña nobo cu delincuentenan bou supervision intensivo lo por keda mas largo bou esaki. Di e manera aki ta spera cu e instancianan por tira bista riba delincuentenan pa mas tempo pa asina en caso cu e delito wordo cometi atrobe por tuma accion mas rapidamente. Hues lo por tambe extende e proeftijd despues di wordo laga liber pa dos aña. Pa ambos medida no lo tin un duracion maximo aplicabel.

Organisacionnan cu ta ofrece servicionan di internet y administradonan di network di nan banda lo wordo exigi pa raporta leknan digital (digital leaks) na e Nationaal Cyber Secutiry Centrum. Esaki ta pa preveni cu infrastructura vital no cay den otro.

Vivienda
Desde prome dia di aña nobo lo personanan cu kier cumpra vivienda mester pone mas placa pa haya esaki. En comparacion cu aña 2017, e prestamo cu por a pidi pa cumpra vivienda a baha cu 1%. Pues antes esaki tabata 101% y awo lo bira 100%.

Pa Asociacion di Propietarionan (Vereniging van Eigenaren, VvE) tambe lo bin par di cambio. Segun NOS ta raporta, casi mita di tur e asociacionnan no ta spaar suficiente. Pasobra esaki por bin na costo di mantencion atrasa di por ehempel techo y lift, gobierno a dicidi pa exigi cu cada VvE tin un spaarpot warda pa mantene nan edificio.

Di banda administrativo, entrante 1 di januari lo tin 8 municipio (gemeente) menos unda lo por biba. Despues di desplega algun municipio den Gelderland, Groningen y Friesland, Hulanda lo conoce solamente 380 gemeente. Esaki ta un cantidad cu ta bahando pa algun aña caba, den 2008 tabatin 443.

Labor
Hulanda lo tin cu bay keda traha pa mas largo. E edad di pension ta hisa riba prome di januari 2018 di 65 aña y 9 luna pa 66 aña. Di otro banda, doñonan di trabou ta wordo incentiva pa emplea hobennan sin empleo, hende grandi of invalidonan. E descuento den premie cu nan lo haya lo wordo regla automaticamente entrante 1 di januari.

Peuter y scol
Tur scolnan di peuter lo wordo considera como traimerdia despues cu e cambionan di 2018 wordo efectua riba prome di januari. Pues e scolnan aki lo mester cumpli cu tur e rekisitonan di traimerdia cu ta existi. Alabes e mayornan cu ta haci uzo di nan tin derecho riba nan restitucion di kinderopvang.

Desde januari tambe diferente scolnan lo por mas facilmente forma un asina yama ‘scol di cooperacion’. Por ehempel un combinacion di un scol publico cu un scol catolico. E posibilidad aki ta existi caba pero cu exigencianan hopi halto.