Mescos cu cada biaha mas studiante Hulandes riba nivel di HBO ta pidiendo yudansa pa caba nan tesis, studiantenan Caribense tampoco ta haya esaki facil. Docente di HBO, Jean-Marie Molina, ta mira cu studiantenan Caribense ta cay pa engaño.

Asociacionnan Hulandes di enseñansa a bati alarma cerca Trouw, pasobra nan ta haya cu enseñansa superior no ta haci suficiente pa guia studiantenan, y ta preocupa cu enseñansa ta birando accesibel exclusivamente pa esunnan cu placa. Segun e corant, tin ‘mas cu cien compania cu ta yuda studiantenan a costo di placa, pa asina scoge un tema di investigacion of pa coregi foutnan di idioma di un producto final traha pa e studiante’.

Grupo vulnerabel
Jean-Marie Molina ta docente riba exito den enseñansa y ta guia studiantenan na Hogeschool van Rotterdam cu cualkier retraso cu nan ta enfrenta pa caba nan estudio. Entre nan tambe tin studiantenan Caribense. Molina ta comparti e preocupacion di e asociacionnan, specialmente ora ta trata di studiantenan Caribense. “Bo por ripara cu ta nan ta sufri mas hopi pa via di e falta di guia.”

“Nos yiunan ta haya menos sosten y nan tin menos hende entre e personanan cu nan conoce cu por yuda nan. Ademas, nan frecuentemente ta studia den nan propio bubble. Pues si e studiante Hulandes ya tin e pisa pa via di falta di guia den enseñansa superior, e ora ey e studiante Caribense tin e sigur mas dificil.”

Menos oportunidad
Den practica por mira tambe cu studiantenan Caribense tin mas chens di druip of keda sinta compara cu otro studiantenan. E rason dicon esaki ta pasa ta, segun Molina, entre otro, pa via di e manera riba cual ta duna feedback na e studiante.

“Ora ta trata di studiantenan Caribense, bo ta mira cu mayoria di loke nan ta skirbi no ta considera como suficiente pa via di e idioma. Y e ta hustifica si nan Hulandes no ta bon. Pero bou di e rason ey no ta duna feedback specifico riba kico mester mehora den su Hulandes. E feedback ey, e ta haya te despues, ora e studiante a drecha e problema caba, cual hopi biaha ta e ultimo chens tambe.” Ademas, den practica studiantenan Caribense cu no tin bon dominio di Hulandes ta haya solamente un chens pa haci e bon.

Engaña

Tin companianan/bureaunan cu ta yuda studiantenan traha nan tesis si nan paga cierto sumanan. “Generalmente mi no tin nada contra e bureaunan aki, pero tin di nan ta sumamente maligno cu ta skirbi e tesis pa e studiante, y pa colmo malo tambe”, Molina ta conta.

“Mi tin studiantenan cu frecuentemente ta uza e bureaunan aki pa skirbi nan tesis, y nan ta faya of nan ta hasta wordo gaña”, e ta sigui splica. “E ora ey, nan ta paga un di e bureaunan ey mas o menos 450 euro pa nan controla nan tesis, pero nan ta controla con e texto tabata skirbi sin duna feedback riba e contenido.”

Miho enseñansa ta costa placa
Mescos e asociacionnan, Molina tambe ta bringa pa mas inversion den enseñansa. “Loke tin cu cambia ta nos vision riba estudio. Nos tin cu inverti hopi mas den guia studiantenan, y mester inverti mas den docentenan cu por facilita esaki.”

Molina a nota ademas cu hopi docentenan cu ta guia studiantenan pa skirbi nan tesis na institucionnan riba nivel di HBO mes no tin mucho experiencia skirbiendo un investigacion. “Hopi biaha e unico investigacion cu nan a yega di haci ta nan propio tesis, cu nan a traha tempo cu nan tabata studiante di HBO. Pues den esey tambe nos tin cu inverti.”