Promer Ministro di Aruba lo ta na Hulanda pa sigui atende e asunto di e ley di supervision financiero, cu Hulanda ta desea di tin den un ley di Reino (RAft). Te awor e negociacion no ta andando bon, segun secretario di estado van Huffelen na Tweede Kamer siman pasa, papiando di ”stroef verlopende onderhandelingen”. E mandatario Hulandes a bay mas leu den tipifica e conversacionnan, bisando cu palabra fuerte lo a cay “di ambos banda”, pa despues coregi y bisa cu e palabranan fuerte (“heftige bewoordingen”), den su concepto tabata bin di un banda so, y e no tabata refiriendo na su banda den e aspecto aki. Loke e secretario di estado tabata sugeri anto cu no a mantene respet di e otro banda, pero pa buena marcha di e asunto e lo a laga e asunto te ey.

Ta mas cu claro cu asina no tin un bon base pa continua e deliberacion tocante e tema aki, pero cu di tur manera mester continua. Esey ademas no ta e problema mayor, sino cu e punto cardinal ta sigui e desacuerdo cu tin entre goberno di Aruba y esun di Hulanda encuanto e urgencia pa sigui pa un ley di Reino, despues di e inclusion di e normanan financiero pa presupuesto di Aruba den e ley local di supervision (LAft). Obviamente Hulanda tabata mira esaki como un paso intermedio pero aparentemente no a pone atencion cu gobierno di Aruba no tabata comparti e pensamento ey. Aunke no a expresa e opinion aki publicamente, ta un hecho cu na e momento aki tin supervision financiero regla pa ley, y e asunto a move den direccion di e diferencia di opinion si esaki, e ley di Aruba, ta suficiente base pa e supervision. Gobierno di Hulanda ta argumenta cu no, alegando cu e ley di Aruba ta keda duna e posibilidad na parlamento di Aruba pa cambia algo den e ley, sin aprobacion di Hulanda, afectando e supervision.

Gobierno di Aruba no ta apoya e punto di vista ey. Kico ta berdad den esaki? Manera nos a yega di vocifera anteriormente den e Editorial aki, gobierno di Reino semper tin e posibilidad pa para un ley di Aruba cu nan no ta aproba. Pa un ley aproba pa parlamento di Aruba bin na vigor, ta necesario pa Gobernador firma esaki. Con e paro por tuma lugar? Un forma ta cu Gobernador, riba orden di Corona of no, esey ta keda for di nos vista, ta nenga di firma e ley, bao di referencia na articulo 21 di e Reglamento pa Gobernador di Aruba, un ley di Reino. Desbentaha: e ta habri henter un proceso di apelacion pa gobierno di Aruba cu lo envolve Raad van State cu mester duna conseho na gobierno di Reino. Otro forma, sin envolvimento di Gobernador manera describi aki, ta pa practica un tipo di ‘arm-twisting’, loke a tuma lugar den e caso di e famoso cambio di e LAft na 2019, tempo cu despues di e deliberacion entre Secretario di Estado di e tempo ey y Promer Ministro di Aruba, e ley a keda sin firma, den man o den lachi, di Promer Ministro. Posiblemente e ‘arm-twisting’ aki a tuma lugar anterior na un posible presentacion di e ley na Gobernador pa su firma, unda a pone bon cla cu e lo haya instruccion pa no firma, despues di cual e proceso a base di e ley di Gobernador lo a cuminza core. Den e asunto aki hopi cos no a sali na cla, pasobra ningun di e dos bandanan ta desea di duna detayes. Sin embargo, cu e posibilidadnan legal existente y e hechonan al caso, ta obvio cu gobierno di Aruba a ‘back off’ y no a presenta e ley pa firma di Gobernador.

Awor, lo tin opinion cu ta bisa cu, si Hulanda por para cualkier cambio di ley cu no ta di nan agrado, anto pakico nan ta keda insisti riba e ley di Reino? Aunke gobierno Hulandes ta keda insisti cu e mesun frase, esta cu nan ta desea di tin e ley di Reino, pasobra Aruba no por cambia nada eyden, nan ta perde e oportunidad di splica mas den detaye pakico no. Nos por imagina cu nan tambe sa cu finalmente nan por para un ley na Aruba pa bin na vigor, pero no ta desea di pasa cada vez den tur e turbulencia cu esey ta trece cune. Y no por kita nan razon cu un eventual locura manera a sucede na 2019 no mester tuma lugar atrobe, tambe pasobra un eventual garantia di mayoria gubernamental den Staten no tin ningun valor, sigur pasobra nunca tabatin un reconocimento di parti di gobierno di Aruba cu e ‘hazaña’ di 2019 tabata un estupidez cu nunca mester a tuma lugar. Nan lo no haci esey nunca tampoco pasobra e dos actornan principal den parlamento cu a organiza e baina ey, awendia ta premia cu puesto di ministro…

Finalmente, e punto mas importante unda e strategia Hulandes di pone presion a fracasa: e idea cu atrobe por a aplica ‘arm-twisting’ riba gobierno di Aruba via e interes mas halto, si nan no kier cumpli cu deseo di Hulanda cu aceptacion di e ley di Reino. Simplemente bisa, gobierno di Aruba a ‘call their bluff’, a sabiendas cu tin placa pa paga, sigur e proximo par di aña. Gobierno di Hulanda tabata ‘naief’ pa kere cu por convence di e forma aki, y awor, asina leu cu nos por mira, no tin mas arma pa obliga Aruba acepta un ley – di consenso – di Reino.