E corant di oposicion Ruso Novaja Gazeta a haya documentonan cu ta conforma cu ehercito Ruso tabata envolvi cu e transporte di e instalacion di e raketa Buk cual casi 5 aña pasa a baha vuelo MH17 riba e area di conflicto na Ucrania. Casi tur di e 298 victima riba e avion tabata Hulandes.

E documentonan ta mustra tambe cu dianan prome cu a baha e Boeing 170 a manda militarnan di ehercito Ruso su unidad anti aereo na e area fronteriso cu Ucrania. E team di investigacion en conhunto (JIT) a conclui cu e desaster cu e den cual e Boeing cual tabatin 298 na bordo a keda baha pa un raket Buk cual tabata procede di e di 53 brigada anti aereo Ruso. Por medio di imagennan haya riba medionan social e team a reconstrui e ruta cu e instalacion di e raket a sigui desde Koersk te na e area unda e separistanan pro Rusia tabata situa.

E colectivo di investigacion Bellingcat a determina ya caba despues di un aña di e incidente cu e MH17 cu e di 69 brigada logistico tabata envolvi den e transportacion di e instalacion di raket den sur di Rusia. E documentonan di e corant Novaja Gazeta ta confirma esaki. Den un di e documentonan e unidadnan di e VAI, e polis di trafico di ehercito a haya instruccion pa guia e carga riba e ruta. Mientras riba otro documento tin para un lista di truck, cu number di plachi y nomber di e chauffeurnan. Tambe e oficial cu a duna e orden riba e trucknan, luitenant Iskanderov ta menciona den e documentonan, mescos e nombernan di 2 otro oficial.

Rusia ta desmenti

Tur esaki ta cay den mal tera cerca Moscu, cual ta nenga cu Rusia lo tabata envolvi di cualkier manera pa transporta e instalacion Buk y otro material militar pa duna e separatistanan pro Rusia, cual den zomer di 2014 tabatin miedo di perde contra e forsanan di Ucrania. Den un combersacion di telefon graba entre un comandante di e separatistanan y Oleg Ivannikov, oficial di e servicio di inteligencia di ehercito Ruso, el a keha cu su tropa no tabatin chens contra e avionnan di guera di Ucrania. Ivannikov a bis’e pa tene ‘un opar di dia mas’ di pasenshi: ‘Nos tin un Buk caba. Nos ta bay dal nan abou’.

E documentonan ta mustra cu na e momentonan 170 militar di e unidad anti aereo a yega Millerovo. Tabata notabel cu a pidi cuminda pa e militarnan pa 5 dia. Esey lo por señala cu nan tabata bayendo un confrontacion na Ucrania.

E documentonan di Novaja Gazeta no ta encera descubrimentonan expepcional y nobo, pero si por uza e documentonan pa identifica esunnan envolvi den e operacionnan. Hulanda lo por uza e documentonan den un procedura huridico contra Rusia pa demostra cu e lidernan den e ehercito Ruso tabata na altura di e transportacion di e raket y kendenan specificamente tabata envolvi.

Segun un resolucion di e conseho di seguridad di Nacionnan Uni Rusia ta obliga pa coopera cu cualkier investigacion riba e echo tragico di e MH17. Ademas segun e tratado di aviacion di Montreal Rusia mester colabora cu trece eventual sospechosonan na husticia of nan lo mester persigui nan nan mes.