Minister di Asuntonan di Reino di Hulanda a contesta riba preguntanan di parlamentario Andre Bosman riba un speech cu prome minister Mike Eman a duna siman pasa.
Sr. Eman a haci promesanan durante un encuentro cu e comunidad Latino, entre otro cu por regla paspoort dentro di 3 aña si su partido lo bin den gobernacion atrobe despues e eleccion awor, segun parlamentario Bosman di VVD a base di e speech aki den un video riba Youtube publica riba 11 di september y di biaha a entrega preguntanan na escrito pa minister encarga Ronald Plasterk.
E video ta mustra prome minister Eman y minister encarga cu Asuntonan Stranhero Benny Sevinger. Sinembargo den e video e promesanan di esaki no ta asina concreto cu sr. Bosman ta indica den su preguntanan.
Un di su preguntanan tabata si ta ‘deseabel cu e paspoort di Reino Hulandes lo wordo duna como regalo pa wordo reeligi’. E minister concerni a pone bon cla cu Aruba no por cambia e ley riba su mes cu ta regla e rekisitonan pa obtene un paspoort. E proceso normalmente ta tuma un minimo di 5 aña, asina e ta splica. Y Aruba no mag di ni desvia di e ley Rijkswet voor het Nederlandschap ni e Paspoortwet. “E rekisitonan aki ta den caminda pa por duna un paspoort di Reino Hulandes como un regalo”, asina e minister ta contesta.
Mester remarca cu e partido di sr. Eman, AVP ta desmenti cu nan lider a haci e promesanan. Esaki Rene Herde a expresa atrobe cu niun biaha e prome minister Eman a menciona algo di paspoort. Den un video e ta dirigi su mes directo na e parlamentario Bosman indicando cu sea e parlamentario Hulandes a yuda e campaña di MEP cu e ‘mentira’ of ‘su amigonan di MEP a haci mal uzo di dje’ . Sr. Herde ta haya cu e parlamentario a duna e gobierno di Hulanda tambe un mal nomber como cu e minister Hulandes mester a duna contesta riba preguntanan riba un situacion ‘cu no ta existi’.
E video cu ta menciona den e preguntanan por haya riba Youtube bou titulo: Haatzaaiing tegen Nederaland door de AVP op Aruba. (Nederaland robes skirbi pues, red.). Den e video aki por scuch solamente sr. Sevinger haci promesanan riba e proceso di paspoort pa inmigrantenan bibando riba e isla. Sinembargo riba red social despues cu a lansa e video ki, personanan presente na e evento a indica cu prome minister tambe a haci promesanan concerni e proceso (mas lihe) pa haya nacionalidad Hulandes/paspoort.
