Recientemente, parlamentarionan di Tweede Kamer, Don Ceder (ChristenUnie), Mpanzu Bamenga (D66) y Raoul White (Groenlinks-PvdA) a entrega un mocion tocante influencia di China den e paisnan Caribense di Reino. Den un carta na Tweede Kamer riba e asunto, minister di Exterior a expresa preocupacion pa e influencia economico creciente di China na Aruba, Corsou y Sint Maarten.
Den un carta dirigi na presidente di Tweede Kamer, minister di Asunto Exterior, Caspar Veldkamp siman pasa, e minister a referi cu tabata respondiendo na e promesa di Secretario di Estado pa Relacionnan di Reino, Zsolt Szabo di 23 di october ultimo, durante e debate plenario tocante aprobacion di presupuesto di Relacionnan di Reino (IV) y fondo BES (H) pa 2025, y pues ta contestando tocante e mocion entrega pa miembronan Ceder, Bamenga y White.
Segun minister Veldkamp ta nota, e paisnan di Caribe den Reino ta autonomo den creacion di relacionnan internacional economico. E principionan di politica exterior ta establece e marco pa esaki. E vulnerabilidadnan den ambito di seguridad economico en relacion cu inversionnan stranhero tambe por tin consecuencia pa Reino en su totalidad. Den e sentido aki, e influencia economico creciente di China den e region en general ta relevante.
Ministerio di Asunto Exterior ta sigui di manera general e actividadnan di China den e region y ta mantene un dialogo continuo cu e paisnan tocante esaki. E nota di politica di Reino, ‘Hulada-China: un ekilibrio nobo’ ta fungi como marco pa esaki. E minister ta nota ademas cu Tweede Kamer lo ricibi pronto un carta riba e desaroyonan den politica pa cu China, den bista di un debate di e Comision tocante China dia 18 di december. Ta bay inclui e tema aki den e carta en cuestion, y mirando esaki, e minister ta desconseha e mocion.
