‘Burgemeesternan’ mester cumpli cu locual a acorda aña pasa, ta landspakket ta goberna, segun Marisol Lopez Tromp

Gobierno di Reino a dicidi pa no manda e siguiente sosten di likides pa Aruba. E decision aki a cay den e reunion di Conseho di Minister di Reino di ayera, y Prome Minister Evelyn Wever Croes a informa comunidad mesora pa medio di su Facebook cu no ta bay ricibi e fondonan.

Segun Prome Minister, motibo ta cu Hulanda a exigi pa corta 60 miyon florin for di AZV y Aruba unicamente a cumpli cu 40. Manera ta conoci, Prome Minister a bisa siman pasa caba cu si no ricibi e fondonan di Hulanda, lo haci prestamo pa cubri e necesidad financiero.

Segun e decision di Conseho di Minister di Reino, pa yuda absorbe efectonan di e pandemia di COVID-19, Corsou, St. Maarten y Aruba tur a ricibi sosten di likides desde 2020, bao condicion cu ta ehecuta e landspakketnan cu reforma y supervision riba nan. E necesidad financiero ta keda evalua cada kwartaal, mescos cu ta e evaluacion riba ehecucion di e landspakketnan. E sosten pa e di cuater kwartaal di 2021 lo tabata e di 7 tranche di e sosten di likides.

E conseho ta basa riba locual College Aruba Financieel Toezicht, CAft ta propone na Gobierno di Hulanda, pero tambe e reportahe di ehecucion riba e landspakketnan den e di tres kwartaal. Ningun di e tres paisnan no a cumpli completamente cu e condicionnan cu a keda stipula na e di seis tranche. A bin hopi retraso den implementacion di e reformanan acorda den e landspakketnan.

Segun Conseho di Minister di Reino, e falta di progreso riba algun expediente crucial ta asina preocupante cu e organo cu ta traha den anticipacion di COHO, esta e Tijdelijke Werkorganisatie a hasta propone pa un guia administrativo pa Corsou y Aruba.

Pa tal motibo a propone pa no duna Corsou ni Aruba sosten di likides. St. Maarten ta ricibi 22 miyon florin.

Pa por percura cu ta cumpli cu e condicionnan acorda, entre otro riba e maximalisacion di e entradanan top, a dicidi cu ta pone condicionnan adicional, cu ta acopla na e ley Hulandes, Normering Topinkomens (normanan salario top).

Consecuentemente, Conseho di Minister di Reino a dicidi cu ta wanta cu e sosten pa Aruba te e siguiente reunion di Conseho di Minister di Reino cu ta na october.

Den e lista di decision di Conseho di Minister di Reino no a inclui e discusion riba e recorte pa AZV, sino mas bien a papia riba e normacion di salarionan mas halto cu Aruba no a cumpli cune. Pero analistanan a bisa Bon Dia Aruba cu mas ainda, Gobierno di Aruba no a cumpli cu hopi condicion, manera ta e BVP, cu ta e plan pa reforma e aparato publico y cambia e sistema di recompensacion di empleadonan publico. No ta unicamente e falta di cumplimento cu recorte di AZV tabata motibo cu Hulanda a dicidi pa wanta e sosten di likides.

Parlamentario di MAS, Marisol Lopez Tromp tabata hopi skerpi den su reaccion riba e declaracion di Prome Minister. “Segun Prome Minister, Hulanda a para placa pa Aruba pa lunanan di october te cu december 2021, pasobra Gobierno no a corta e suma di 60 miyon den cuido di salud manera Gobierno mes a acorda cu Hulanda. E proceso di formacion y 115 reunion cu stakeholders a dura casi 3 luna y segun Gobierno, no tabatin mandato pa actua,” Lopez Tromp a bisa riba su cuentanan riba rednan social. “Pero Gobierno a tuma hopi otro decision, siendo demisionario.”

Marisol Lopez Tromp a bisa Bon Dia Aruba cu e liña den e documento publica pa Conseho di Minister di Reino no ta papia mes di AZV, sino di otro tema. “Eleccion a pasa. Awor landspakket ta goberna nos pais y nos ‘burgemeesternan’ nobo tin cu cumpli cu locual a acorda aña pasa,” lider di MAS a declara.