Hulanda por bin yuda… Pero ta nos mester hacie…

Raad van Advies a entrega un obra di conseho extenso, cu ta recomendable pa tur esnan cu kier tin un opinion fundamenta di e problematica di ayudo Hulandes na e islanan, specificamente Aruba, den e caso aki. Ta visible cu nan cnseho no tabata skirbi ‘riba un diahuebs atardi’ y nos lo duna amplio atencion na esaki. Esey ya caba for di e punto di vista cu e ley cu ta trata den esaki, e proyecto di ley di Reino pa COHO, e organismo cu mester bay supervisa e esfuerzonan conhunto cu lo mester haci den e proximo añanan pa trece nos isla back den awanan economico y financiero mas tranquil. Pero, manera ta di comprende for di punto di vista di desaroyo general, economia y finanzas no ta defini tur cos y ta importante pa tuma e aspectonan na cuenta cu ta hunga nan papel den e aglomeracion di factor cu finalmente ta defini den ki direccion un comunidad ta moviendo.

Mester bisa cu den e documentonan cu a sali te awor, e acuerdo y Landspakket, ademas e Uitvoeringsagenda, por mira un gama amplio di factor cu tur ta importante pa por papia di exito den implementacionn di loke den e proximo añanan ta e tarea, tanto pa cualkier gobierno cu lo surgi di e contienda di otro siman, como pa e ciudadano individual tambe. Awor, pakico e conseho di RvA aki ta importante? Den nos vision, pa cuminza caba pasobra e ta pone enfasis pisa y corecto, riba e necesidad di ‘consenso’. Den esey no ta trata solamente cu mester tabatin consensoentre e paisnan den Reino pa yega na e propuesta di ley pa institui, pero mas ainda lo mester di consenso pa cuminza y termina e ‘job’ aki di varios aña cu exito. Exito di cual nos futuro como pais ta depende grandemente. Y aki e organo di conseho mayor ta constata, obviamente, cu e ‘consenso’ no tabata algo logra den pleno consulta benevolente, sino cu e tabata un consenso obligatorio, pasobra e partner cu tin recurso a impone condicion ‘sine qua non’. Aunke cu e Conseho despues mes ta bisa cu aparentemente tin de hecho un consenso y cu mester tuma esaki como punto di salida, e constatacion ey cu tabatin un cierto grado di coercion ta algo cu no solamente tin su consecuencia pa e detayenan di e ley, unda cu tin hopi cos cu por drecha y cu nan ta menciona y comenta ampliamente, sino cu esaki tin consecuencia pa e tarea di varios aña cu lo sigui despues cu e ley keda aproba y e trabao di largo plazo aki cuminza.

Pasobra, kico nos ta bay gana si desde e promer momento tin rencor y rabia pa e manera cu e cosnan a bay, cu nos representantenan ta sinti cu nan mester a actua ‘cu cuchiu na garganta’? Sin un grado alto di disposicion di busca ‘common ground’ y no perdiendo di vista ta kico ta e tarea primordial: logra un Aruba mas prospero, financieramente mas solido, cu mihor instancianan gubernamental cu ta sirbi nan pueblo, y no al revez, nos no ta bay logra. Y ta necesario pa nos logra, pasobra si no, nos mester reconoce cu nos no por drecha nada; esaki ta nos oportunidad. Ya nos no ta bay dedica tempo ni esfuerzo mas na esnan cu ainda ta gritando cu ‘nos mes por’, pasobra ta proba caba cu e unico cos cu nos por ta hinca nos mes den un abismo di cual awor nos no por sali di nos mes.

Esey ta implica anto cu nos mester para un banda y laga Hulanda dicidi promer y despues, dilanti y patras, kico mester haci? Absolutamente cu no, y esey pa un motibo hopi simple: algun dia nos mester sigui goberna nos mes pais, cu nos autonomia intacto, pero e biaha aki sin cay den e erornan cu a pone nos unda nos ta awe. Y ta pesey cu desde un promer momento nos mester ta ‘bij de les’, pa cuminza cu den e ley di COHO (y RAft) tin un input di Aruba mes. Y esey no den un sentido negativo, pero positivo den e sentido cu den tur asunto e gran parti di e conocimento cu mester ta aki mes. Pero ojo: e conocimento ey no ta exclusivamente den man y mente di e ‘hendenan di confianza’ di esnan cu dado momento ta den gobierno. Nos mester di nos mihor hendenan, irespecto color politico. Den e conseho aki di RvA ta referi na uso di Centraal Planbureau di Hulanda pa yuda nos. Excelente idea, pero ki dia nos ta bay traha riba un Planbureau di nos mes? Y nos ta mira esey bay funciona, si eyden nos ta continua cu e cultura maligno di partidismo politico? Of nos ta bay realmente selecciona nos mihor cuadronan riba diferente tereno, y respeta nan opinion? Djis un ehemplo, nos ta kere cu, por drecha algo den ensñanza, si nos tur ta keda predica pa nos propio paroquia y nada no ta bin hunto? Hulanda kier yuda den esey tambe, pero nan lo trece nos hunto, ‘pone nos cabeznan na waterpas’, o ta nos mes mester haci esey? E debate unda nos ta bay lo sigui sin tregua; esey ta bon pero ban percura pa resultado tambe.