Personal di al menos 50 hospital na Hulanda lo bay den welga otro luna, segun e unionnan di comercio diamars. E hospitalnan afecta lo ta habri pa “Servicio di diadomingo” solamente pa cuido di emergencia. E dispuesto pa tuma accion ta halto, y e unionnan ta spera cu mas hospital lo participa pa ora welga cuminsa na maart.
E trahadonan di hospital ta welga pa un acuerdo colectivo miho. Unionnan di comercio FNV, CNV, NU’91 y FBZ a duna e asociacion di hospitalnan Hulandes NVZ te awe merdia pa ta den acuerdo cu nan demanda. NVZ a bisa cu e no por, pues e unionnan lo continua cu nan accion di labor.
E 4 union di cuido di salud a insisti riba un aumento di 10% riba nan salario den e acuerdo di 1 aña, un bonus extra pa oranan iregular y riba esaki 100 euro mas. Nan tambe kier pa trahadonan haya placa bek pa parking of ora nan a uza transport publico pa bay trabou. “Ademas, e empleado mester tin e derecho di no ta disponibel na momento cu e no ta poni den cronograma,” e unionnan a declara den nan ultimatum.
“Den un economia unda profesionalnan di cuido di salud caba ta experiencia dificultad pa tin suficiente placa tur luna, e oferta di NVZ ta inaceptabel. Esaki ta pasobra cu e inflacion lo ta mas halto cu kico NVZ a pone riba mesa,” Stella Salden di NU’91 a bisa siman pasa ora unionnan a anuncia nan ultimatum.
NVZ a bisa cu e simplemente no por cumpli cu e demanda di e unionnan, pero si lo kier negosha mas. NVZ a bisa cu nan a keda sorprendi cu e unionnan a entrega un ultimatum. “Y asina mes cu nos a progresa bou guia externo. Accionnan di labor ta desproporciona pa loke ta trata e oferta final di 13% aumento den salario den 2 aña,” E presidente di e asociacion, Ad Melkert, a bisa.
E acuerdo di labor colectivo pa hospitalnan ta cubri mas cu 200.00 empleado den 65 hospital y 14 centro di rehabilitacion. E unionnan no a bisa exactamente ki ora e welga lo tuma luga, djis cu esaki lo sosode na maart.
