Un pastoor di e ciudad di Den Haag cu ta procedente di Ghana a wordo sentencia na 5 aña di prizon pa a abusa sexualmente di dos mucha muhe ruman di otro. Ministerio Publico di Hulanda a pida 6 aña pero hues a dicidi otro. E dianan di voorarest (dianan cu tabata cera mientras ta trata e caso) a ser desconta di e sentencia.
Durante e tratamento di corte a keda proba cu e homber tabata mishi cu e muchanan durante un periodo di 15 aña. E homber tabata pastoor di e iglesia na cual e famia di e victimanan tabata asisti. Despues di a cera un amistad cu e famia, desde 2001, e homber tabata pidi pa e muchanan bay su cas pa haci algun tarea. Ora cu e abusonan a cuminsa, e muchanan tabata tin 9 y 11 aña.
Segun corte, e homber no a tene den consideracion e sentimentonan di e victimanan y tabata precupa pa su propio placer sexual. Banda di esey, corte di Den Haag ta di opinion cu e homber a abusa di su poder como pastoor y tambe di su amistad cu e famia.
E homber a para ariba di su inocencia y a desmenti di lo a mishi cu e muchanan. Segun e pastoor, ta un complot e ta contra di u persona. Sinembargo, e victimanan a conta na nan turno detayadamente con e abuso a tuma luga durante 15 aña y con esaki a daña nan bida.
Banda di su castigo di prison, e homber a haya prohibicion pa fungi como pastoor pa 7 aña. Descontando e 11 luna di pre aresto, e homber lo mester ainda un castigo di alrededor di 4 aña.
