Minister di Financia, sr. Angel Bermudez ta kere cu si Hulanda kier berdaderamente yuda Aruba pa atende cu su financia publico, un di e miho manera lo por ta, cu nan lo por yuda refinancia e debe nacional di pais Aruba na un interes mas abou. Pero e ta haya cu pa motibo politico te ainda Hulanda ta nenga nos e facilidad aki, cu ciertamente e mandatario no ta hay’e husto.
“Si un banda tin un caminda cu Hulanda por yuda Aruba pa loke ta trata reduci structuralmente gasto di interes, ta door di cierto momento, ora cu tur aña nos ta refinancia cierto debenan cu ta cancela y cu nos no por paga ainda, pero cu nos tin cu refinancia, Hulanda por refinancia”, segun e mandatario.
Un di e tematica tanto di IMF (Fondo Monetario Internacional) como di e Caft ta cu e gasto di interes cu pais Aruba ta paga pa su debe nacional ta substancial, ya cu e ta un 15% di nos presupuesto nacional, alrededor di un 4% di nos GDP. Pais Aruba ta pagando mas cu 200 miyon na interes pa aña.
E mandatario a laga sa cu durante e ultimo añanan nan a realisa diferente maniobra financiero caminda nan a reemplasa hopi debe door di debenan mas barata pa asina Gobierno por baha su gastonan di pago di interes di su debe nacional. Pero esaki no por wordo haci structuralmente, ya cu gobierno mester paga su debe prome pa asina e interes cu mester paga tambe ta keda cancela.
Refinancia debe nacional
Di otro banda, e mandatario a laga sa cu semper den su contesta na Caft -institui pa gobierno di Hulanda- e ta formula su solicitud pa Hulanda por yuda pais Aruba structuralmente pa atende cu su financia y debe nacional. E solicitud ta si Hulanda por ofrece nos pais e facilidad di fia barata, mescos cu tur otro paisnan di reino Hulandes, esta Corsou, Bonaire, St. Maarten, Saba, etc. cu ainda ta gosando di e facilidad aki.
E facilidad aki lo por brinda e posibilidad cu nos pais por financia su debe nacional na un interes entre un 1.5% y un 1.8%. E tasa di interes aki ta hopi menos cu e averahe di un 5% di interes riba nos debe nacional cu pais Aruba ta pagando awe y cu ta sali for di nos presupuesto. Esaki ta un punto fundamental cu e mandatario a yega di trece varios biaha cerca e colegio financiero di Caft.
Te hasta e mandatario a laga sa na Bon Dia Aruba cu e no ta kere cu pais Aruba no mester di un sanacion completo di su debe nacional, manera Hulanda a yega di haci cu Corsou na 2010. Minister Bermudez su opinion personal ta cu e ta considera cu e decision aki a causa un tremendo problema den nan sector financiero, ya cu e sector bancario of di credito a haya tur nan placa di un solo biaha, y despues cu e pais tabatin mas facilidad di financiamento, no tabatin basta proyecto economico pa inverti e placa. E no ta kere cu esey ta e tipo di solucion cu pais Aruba kier, pero loke si Hulanda por haci ta pa ehempel, e aña aki cu pais Aruba ta bay refinancia 414 miyon cu Hulanda un parti di dje por refinancia cu nan facilidad.
Na luga cu pais Aruba mester paga 4.45% di interes riba mercado di credito, Aruba por haya e facilidad di por paga 1.5% for di Hulanda. E ta casi 3% di diferencia di locual pais Aruba ta pagando actualmente, y cu e mandatario ta haya cu ta un diferencia substancia cu por yuda structuralmente pa gobierno por baha su gasto di interes.
