Hulanda: Oncologonan ta adopta rekisitonan mas streng pa medicacion di cancer

(NLTimes)—Oncologonan na Hulanda ta bay husga medicacion di cancer mas streng prome cu nan prescribi esaki na pashentnan, segun e liña di guia nobo for di e comision di oncologo y neumonologo Hulandes. Den pashentnan cu un expectativa di bida di un aña of mas, e medicacion mester extende nan bida pa al menos cuatro luna en bes di e standard actual di tres luna. Segun De Volskrant a reporta, federacionnan di pashent ta hopi insatisfecho cu esaki.

Investigacion cientifico recien a mustra cu hopi medicacion nobo—y hopi biaha hopi caro—cu a drenta mercado den e ultimo añanan ta solamente extende bida di pashent di cancer pa un averahe di dos pa tres luna. Hopi di e medicacionnan aki tambe tin efectonan basta grave.

Oncologonan a tuma nota di esaki den practica, y despues di un discusion, e gruponan profesional pa oncologonan (NVMO) y neumonolonan cu ta traha pashent di cancer (NVALT) a vota pa haci e criterio mas streng.

Pa via di rekisitonan mas streng, tin chens cu oncologonan no lo prescribi remedi nobo. Pa medicacion cu por preveni e cancer di bin back despues di tratamento, e compania farmaceutico mester mustra cu e remedi en berdad ta extende bida di pashent. Pa medicacion pa pashentnan terminal, si e expectativa di bida ta al menos un aña, e remedi mester extende bida pa al menos 16 siman mas.

E Federacion Hulandes pa Organisacionnan di Pashent cu Cancer (NFK) no ta contento mes: “E dokternan aki ta laga pashent riba caya,” segun Pauline Evers di NFK a bisa. Segun e federacion, e criterio modifica ta bay nifica cu pashent na Hulanda no lo tin acceso pa te cu un kwart di e medicacion aproba pa EMA. “Esaki ta un porcentahe hopi halto y inaceptabel. Esaki ta bay haci cu tratamento ta for di e pashent su alcance.”

Segun NFK, pashentnan mester por dicidi cu nan dokter si un remedi tin balor pa nan. Esaki no por dicidi a base di e nivel di populacion. Un par luna di bida mas tin biaha ta significa tur cos pa e pashent, NFK a declara. Y no mester tin un criterio di seleccion pa esaki.

E grupo di interes pa companianan farmaceutico, VIG, tambe no ta contento tocante e criterio nobo. Segun VIG, pashent na Hulanda no lo por tin e mesun opcion di tratamento cu pashentnan den otro pais si tin: “Esaki por causa cu pashentnan Hulandes ta cay atras. Esey ta inaceptabel.”