(NLTimes)—Tin al menos un par decenas di ciudadanonan Hulandes na Gabon, unda e ehercito a tuma poder diamars, segun Minister di Asunto den Exterior Demisionario Wopke Hoekstra. Actualmente no tin ningun plan pa evacua ciudadanonan Hulandes for di e pais Africano.
“Un grupo relativamente limita” di hendenan Hulandes ta biba na Gabon, Hoekstra a bisa ora el a yega na Toledo, Spaña, unda e lo consulta cu coleganan di Union Europeo tocante e ola di sorpresa di rebelion militar na Africa, entre otro.
Nos ta hopi preocupa tocante e ultimo desaroyonan na Gabon. Nos ta monitoriando e reportahenan siguiendo e rebelion y evaluando e situacion actual den e pais,” Hoekstra a bisa tocante e rebelion riba X, conoci prome como Twitter. “Nos ta urgi tur hende pa keda leu for di violencia y pa priorisa e seguridad y bienestar di e ciudadanonan Gabones.”
Experencia ta mustra cu tin probablemente mas residente Hulandes den e pais cu loke e minister sa. P’esey Hoekstra a urgi hendenan Hulandes na Gabon pa “por fabor reporta bo mes na nos.” E Ministerio no por provee asistencia si e no sa cuanto hende tin exactamente.
Te awo, paisnan Europeo no a evacua nan ciudadanonan for di Gabon ainda, segun e Hefe di Asunto den Exterior pa Union Europeo, Josep Borrel, a bisa. Evacuacionnan si a tuma luga den otro rebelion na Sudan y Niger, por ehempel.
