Durante e reunion den Parlamento diamars pasa manera anticipa no a bin dilanti tanto detaye nobo, y por a presencia un repiticion di posicion, tanto di gobierno como di e partidonan cu tabatin otro opinion, y cu ta mas na fabor di un ley di Reino pa supervision financiero.

Un di e aspectonan enfatiza pa banda di gobierno mes tabata e motibo pa cual Hulanda no ta desea mas pa laga e supervision financiero den e actual ley di Aruba. Segun nos Promer Ministro, te awor su gobierno no por a haya un contesta cla di gobierno Hulandes tocante esaki. Hulanda den vista di e promer mandatario no a duna un motibo huridico cla y coherente pa esaki. Muy probablemente e contesta ey no lo bin tampoco, pasobra e ta basa riba mal experiencia cu (casi) e mesun gobierno, unda despues cu a firma protocol na november 2018 y e cambionan cu a acorda mester a bin den un cambio di e ley local (LAft), e fraccion di e mesun partido mayoritario gubernamental a haci un intento pa elimina e autoridad supervisor di gobierno di Reino for di e ley. Parlamento den su mayoria gubernamental a aproba esaki, cu aparente alegria y satisfaccion di e propio Promer Ministro. Seguidamente Hulanda a usa su poder pa para firmamento di e ley, y gobierno di Aruba tabata obliga di acepta cu supervision financiero, manera describi den e ley, plus e protocol, tabata base di e acuerdo segun cual den e añanan te awor e supervision a funciona.

Den su discurso nos Promer Ministro a trece dilanti, como argumento pa mantene e ley di Aruba di supervision, cu si acaso un gobierno y/o parlamento kier haci cambio cu no ta palabra entre Aruba y Hulanda, tin suficiente instrumento pa para esaki. Nos ta comparti e pensamento aki, solamente den e sentido cu nos promer mandatario sa bon, pasobra na 2019 el a ripara di mal manera cu gobierno y Parlamento por haci loke nan kier, pero cu firma di Gobernador ta bin solamente si Hulanda ta di acuerdo. Cu Hulanda keto bay tin problema cu e incidente ey, por deduci for di e Memorie van Toelichting di e propuesta pa e RAft, unda ta remarca cu e acuerdonan firma den e Protocol 2018 te awe no ta incorpora den e ley: “Tot op heden is de Landsverordening niet aangepast.” Esaki ta ser interpreta na Hulanda como un compromiso cu cual gobierno di Aruba no a cumpli… Y si manera e propio mandatario na mas cu un ocasion ta keda enfatiza e independencia di Parlamento y cu e no por obliga Staten, unda e tin un mayoria, anto ta bira mas comprensible cu Hulanda no tin gana di haya repiticion di e circo ey. Por lo tanto e insistencia Hulandes pa pasa e supervision, practicamente manera cu e ta den e ley di Aruba, pa un ley di Reino. Esaki na e momento aki ta parce e punto no negociable di banda Hulandes.

Di otro banda, manera e promer mandatario a trece dilanti, Aruba tambe tin un punto fuerte den e negociacion y esey ta e insistencia pa logra un ‘kwijtschelding’ pa por acepta e ley di Reino. Pa e exoneracion aki ta mustra riba e caso di e otro islanan, cu den e acuerdo di 2010 a haya exoneracion di un parti importante di nan debe publico. Mester bisa berdad cu no conoce un motivacion cla y coherente di gobierno Hulandes pa esaki. Loke si nos ta pensa ta cu na 2015, tempo cu a negocia e ley Arubano na lugar di un ley di Reino, unda e ultimo aki no lo tabata di consenso, lo tabata demasiado exigi tambe un exoneracion. Nos ta keda enfatiza cu na 2015 tabatin un situacion di, sea acepta e ley di Reino, o haya esaki imponi via un Decreto Real. E alternativa pa hinca e supervision financiero den un ley di Aruba tabata e unico manera pa parcialmente scapa cara pa e gobierno di e tempo ey. Cu esaki anto e situacion concreto den cual a yega na supervision financiero tabata totalmente otro cu esun di e dos otro islanan na 2010. Sin embargo, esey no ta kita cu talvez un exoneracion – parcial – por ta un ‘bargaining chip’ riba mesa. Otro elemento importante ta sigura cu Aruba lo por refinancia e debenan den exterior madura via Hulanda, loke lo ta un beneficio grandi pa Aruba y cu no ta costa Hulanda nada.

Por ultimo e presion Hulandes via e oferta di diferente tasa di interes, si Aruba bay di acuerdo o no cu e ley di Reino. Den esaki en berdad tin e riesgo cu despues cu bay di acuerdo cu e ley, te cu e ley bin na vigor, loke ya caba no por promer cu 10 di october 2023, lo tin un tasa mas halto pa e prestamo cu Hulanda. Esaki no por interpreta otro cu un presion menos elegante di banda Hulandes, cu ta birando impaciente cu un asunto cu ta andando pa tanto tempo caba. Sin embargo, e gastonan di esaki no tin comparacion cu e suma enorme di financia henter e debe di 916 miyon na interes halto… E experiencia con gobierno di Aruba a maneha asunto te awor no ta duna Hulanda confianza pa regla e asunto di otro forma. Gobierno di Aruba no tin confianza aparentemente cu nan por haya un trato ‘fair’ di Hulanda. Loke nos no a scucha ta: kico ta haci si no yega na un acuerdo? Un cos ta sigur: no ta Aruba ta dicidi si tin supervision, esey ta asunto di e supervisor…