Hulanda no ta mira mucho den e proposicion di iniciativa

Minister di Asuntonan di Reino no ta mira un urgencia pa cambia e Statuut pa asina facilita, entre otro parlamento di Aruba pa bin cu un iniciativa pa un ley di Reino dilanti den Tweede Kamer.

Esaki  minister Ronald Plasterk ta contesta Tweede Kamer recientemente despues cu a sali un conseho tambe di e organo Raad van State riba e proposicion di ley di iniciativa di parlamentario Andin Bikker.

E organo halto di conseho (comparabel cu e Raad van Advies na Aruba) ya a duna di conoce fin di november, kico nan ta pensa di e proposicion Arubano. Na prome instante nan no ta haya necesario cu mester duna parlamentarionan individual di parlamentonan di Aruba y tambe di Corsou y St. Maarten, e derecho pa bin cu proposicion di ley (derecho di iniciativa) riba nivel di Reino. Segun Raad van State, esaki ya ta regla caba den forma cu awor e minister Plenipotenciario por entrega leynan. Pues e instrumento proponi no ta algo nobo y minister Plasterk ta sigui e conseho di Raad van State tambe.

Locual tambe por lesa den e carta di minister Plasterk pa parlamento Hulandes, ta cu e organo di consulta si ta haya cu e proposicion di Sr. Bikker ta un ‘paso importante’ pa yega na un parlamento di Reino. Esaki lo cambia e relacionnan den Reino y tambe e Statuut (e constitucion di Reino). Minister Plasterk ta comparti e pensamento aki, sinembargo ta mustra riba e discusion largo cu ta canando caba riba e introduccion di un parlamento di Reino. E no ta mira cu e discusion aki lo caba pronto y cu den Reino lo yega na un acuerdo riba corto plaso.

E caminda e ora, ta un caminda largo cu lo ‘tuma hopi tempo y energia’ sin cu tin bista riba resultadonan concreto, segun e mandatario Hulandes. Mientrastanto di otro banda e Statuut ainda ta duna oportunidad pa yega resultadonan similar, pero cu e paisnan den e parti Hulandes Caribense no ta uza.

Raad van State e ora ta conseha pa un miho alternativa unda e parlamentonan di Aruba, Corsou y St. Maarten por propone leynan y asina e parlamento completo di cada pais tin e derecho di iniciativa. Sinembargo minister Plasterk no ta mira e urgencia awor pa cambia e Statuut riba e punto aki, mirando cu ainda no ta uza e instrumentonan cu ya tin caba suficiente. Finalmente e minister ta haya cu ta interesante pa mira kico e comentarionan di e otro paisnan den Reino ta, como cu e proposicion a bin for di un parlamentario Arubano so.