Hulanda no lo suavisa condicionnan pa acuerdo di Union Europeo

Prome minister Hulandes, Mark Rutte a bisa parlamento cu Hulanda no por acepta ningun intento pa suavisa condicionnan pa e fondo nobo di Union Europeo pa presupuesto y recuperacion, a pesar di un menasa di veto di Hungria y Polonia.

E acuerdo di compromiso ya ta e ‘limite mas abao’ pa Hulanda, y no por suavisa e condicionnan mas pa agrada e Hungaronan y Polaconan.

“Esaki ta crucial”, Rutte a bisa parlamentarionan durante debate parlamentario diamars. Otro opcion, describi pa Rutte como e maneho ‘nuclear’, lo ta pa limita e fondo di presupuesto y recuperacion na e 25 otro estadonan miembro.

Sinembargo, el a bisa, esaki lo converti UE den un ‘union intergubernamental sin comision y parlamento’. Ademas, e problema actualmente no ta keda na Hulanda sino na Alemania, cu ta presidente di UE na e momento aki, na parlamento Europeo, y na e comision, el a bisa.

Durante e debate, parlamentario di ulraderecha Geert Wilders a bisa cu Rutte no tabatin mita di e curashi di prome minister Hungaro, Viktor Orban. Rutte a contesta puntra Wilders si e mester sigui ehempel di Orban. “Mi lo mester limita derechonan homosexual, limita libertad di prensa na Hulanda, y limita e derechonan di partidonan mas chikito pa participa den eleccion”, el a bisa. “Mi ta contento mi no ta manera e, teribel.”

Miembronan di UE a urgi Hungria y Polonia pa elimina e blokeo di e acuerdo, pero e dos pais te awo a resisti apelacionnan pa cambia nan posicion. Nan ta argumenta cu haci e pakete di presupuesto y ayudo condicional riba e cumplimento di e paisnan recipiente cu estado di derecho ta ataca nan riba un base politico y ideologico. Ta spera cu e asunto lo bin dilanti durante un videoconverencia awe, pero e proximo reunion presencial di lidernan di UE ta programa pa december, segun EU Observer a reporta.

Algun miembronan Hulandes di Parlamento Europeo tambe a pidi pa un postura mas fuerte pa cu e dos pais. “Nos ta bezig purbando di tene Polonia y Hungria riba e bon caminda pa 10 aña pero nan ta keda evadi nos esfuersonan”, parlamentario Europeo di PvdA, Kati Piri a bisa. Piri ta lider interino di e grupo social democrata den parlamento Europeo.