(NLTimes) – Hulanda no lo logra construi 1 miyon cas den e siguiente 10 aña, personanan involucra a conta corant AD.
Gobierno kier combati e escasez di vivienda enorme y acomoda e poblacion cu ta premira di crece. Sinembargo e tarea poni den man di e municipalidadnan ta demasiado grandi mirando e escasez den capacidad y cartera, regulacionnan di ambiente y e escasez di empleadonan di construccion. Segun Jan van Zanen e asociacion di municipalidadnan Hulandes VNG 500,000 pa 750,000 cas nobo ta e cantidad maximo cu por logra.
Segun van Zanen, e municipalidadnan lo tin mester di por lo menos 2 biyon euro extra pa aña pa por logra Gobierno su metanan pa cu construccion di as. E municipalidadnan tambe ta lidiando cu hopi tiki empleadonan civil cu kier procesa tur e permisonan necesario na un velocidad mas halto. Pero tambe haya luga pa e construccion ta un problema. E casnan nobo no lo cumpli cu e “imagen ideal di un cas cu un hardin dilanti y patras,” e alcalde di Den Haag a adverti di parti di VNG. Casnan ‘high rise’ ta e unico opcion den e ciudadnan.
Maxime Verhagen di e sector di organisacion Bouwend Nederland tambe tin duda tocante esaki, pero te ainda ta sigui cu e meta di 1 miyon cas extra pa aña 2032. “Pa motibo cu si ya caba bo cuminsa reduci te na 750,000, e ora ya caba bo sa cu bo no ta bay logra,” el a conta AD. “E ambicion halto aki ta hustifica. Pero e realidad ta cu tin un escasez reaslitico den sitio pa construccion. Pa e siguiente 5 añanan, solamente 30 porciento di e plannan di construccion ta legalmente sigur. E otro 65 porciento no ta.”
E duda tocante Gobierno su ambicionnan ta bini for di e experiencia den e añanan recien. 75,000 casnan nobo pa aña tabata considera un bon aña. E desafio nobo ta demasiado grandi tumando e hecho aki na cuenta. Segun AD, e ta nifica cu bo mester crea e mesun cantidad di casnan cu tin den e ciudad di Breda tur aña, of crea casi e mesun cantidad di cas cu tin actualmente na Amsterda, Rotterdam y Den Haag combina den e decada.
Segun Verhagen, e ta imposibel pa crea 100,000 cas nobo pa aña si bo traha di manera tradicional. No tin suficiente tempo ni personal pa esaki. “Nos lo mester crea mas den fabrica. E elementonan pa construi ta crea den fabrica, y despues ta arma riba e sitio di construccion.” Pero un acumulacion di rekisitonan extra di Gobierno lo haci esaki imposibel. “Si tur municipalidad formula nan mesun rekisitonan diferente ademas di e decreto pa cu construccion, bo por lubida di construccion di fabrica.”
E asociacionnan di vivienda ta kere cu nan por logra nan parti di 300,000 cas nobo den e proximo decada, Martijn van Rijn di organisacion Aedes a conta e corant. Pero esaki ta solamente si e asociacion haya acceso na suficiente sitio pa construccion. “Un miyon cas ta hopi, pero e ta posibel pa motibo cu nos tin mester di dje. Nos no tin otro opcion. Mi tin expectativa halto pa cu e construccion modular y industrial pa asina por cuminsa cana e caminda pa logra nos meta.”
