Hulanda: Museonan di acuerdo pa debolbe arte horta

Cantidad di hefe di museo a bisa cu nan lo coopera cu e recomendacion pa debolbe estatua y otro artefactonan horta durante era colonial na nan pais di origen.

Conseho pa Cultura Hulandes a bisa diamars cu hasta 100mil obheto, principalmente for di ex-colonianan Indonesia y Suriname, mester ser manda back si solicita esaki.

Stijn Schoonderwoerd, director di Museo Nacional di Cultura Mundial, cu ta inclui e Museo Volkenkunde na Leiden, e Afrika Museum na Berg en Dal, y e Tropenmuseum na Amsterdam, ta bisa cu e tabata spera cu e minister lo acepta e recomendacion aki. Hunto, e museonan tin alrededor di 270mil obheto den nan coleccion. “Mi no ta sconde tras di estado, pero tur hende mester tuma responsabilidad”, Schoonderwoerd a bisa programa Nieuwsuur. “Nos tin aki un cantidad di estatua Singosari di siglo 13 for di Java. Nan tabata para banda di un tempel kibra, y e Hulandesnan a pensa, nan ta bunita, nos lo tuma esakinan. Y awo nan ta aki na museo Leiden.”

Schoonderwoerd a bisa cu e no tin miedo cu coleccionnan di museo lo acaba. “E conseho mes a bisa cu nan no tabatin e impresion for di nan contactonan na Indonesia cu nan lo ta pidiendo pa debolbe centenares di miles di obheto”, el a bisa. “E cantidad probablemente lo ta limita.”

Rijksmuseum tin 4mil obheto cu un conexion colonial, y ningun a yega di ta e suheto di un peticion pa debolbe esaki, principalmente pasobra no tabatin un procedura pa paisnan por haci uso di esaki. “Nos ta mirando historia cu un luz diferente y esey ta nifica cu nos ta mira e coleccion den luz diferente tambe. Y loke nos ta mira ta haci nos incomodo”, segun Valika Smeulders, cabesante di departamento di historia na e museo y un di e escritornan di e reporte.

E devolucion di obhetonan cu no a ser horta pero ta di gran balor cultural no ta algo cu tur hende ta di acuerdo. Profesor di Universidad di Leiden, Pieter ter Keurs, a bisa cu un paragraf particular di e reporte ta un ‘slippery slope’.

“Hulanda tambe lo kier pa debolbe artefactonan di Era di Oro back na nan. E no lo mira un fin. Mi lo bisa, por fabor pensa con bo ta maneha restitucion hopi cuidadosamente”, el a bisa.

E minister ainda mester responde na e recomendacionnan di e conseho.

E coleccionnan di e museonan ta propiedad di estado Hulandes y estado lo mester dicidi pa debolbe e obhetonan. “Ta nos tarea pa investiga origen di e piesanan y traha di cerca cu e paisnan involucra pa asina nos sa kico ta importante pa nan tocante e obhetonan”, Schoonderwoerd a bisa.