(NLTimes) – Mita di e scolnan primario y secundario na Hulanda tin 1 te 6 posicion vacante na nan scol pa e aña escolar binidero. 5 Porciento ta buscando te hasta 7 of mas docente, segun Telegraaf a reporta basa riba un encuesta cu 1,250 docente ehecuta pa Radboud University na Nijmegen.
E escasez di docente ta afecta scolnan na un nivel nacional, for di regionnan chikito te na e 4 ciudadnan grandi. Varios scolnan ta considerando tuma medidanan drastico.
E hunta di scolnan cristian cu scolnan secundario Middelburg y Vlissingen, te hasta a manda mayornan carta unda ta pidi nan yuda e scol recluta docentenan durante e vakantie. E scol di comunidad tin posicion vacante pa docentenan di Frances, Hulandes, filosofia, tecnologia, fisica y ciencia entre otro.
“E ta hopi posibel cu nos lo mester duna menos les den e prome añanan pa asina sigura cu e lesnan den e añanan mas adelanta por sigui,” e maneho di Walcheren a skirbi na mayornan segun e corant. “Tambe ta posibel cu nos lo mester cancela cierto actividadnan.”
E fundacion pa mayornan cu ta traha a ricibi “un cantidad impactante” di mensahe tocante scolnan cu ta considerando simannan di 4 dia escolar, president Marjet Winsemuis a conta e corant. “Anteriormente, e scolnan a usa reemplaso of asistentnan den klas. Awo e tono den e carta dirigi na mayornan ta diferente. E ta imposibel pa haya suficiente docente. Mayornan, bon suerte cu esaki.”
Winsemuis ta critico cu e scol su tono. “Scolnan mester tuma mas responsabilidad. Claramente, educacion no ta cuido di mucha. Pero esaki definitivamente ta un tarea secundario. E mensahenan pesimista di parti di e scolnan ta causa stress pa e mayornan, incluyendo financieramente. Ta manera nan ta informa mayornan cu nan tin cu traha menos pa cuida nan muchanan.”
Luna pasa, Educacion Council a urgi e gobierno considera limita e oferta educacional pa asina por lidia cu e escasez di docente. Esaki ta nifica cu e studiantenan lo ricibi menos les mientras e tempo di duna les di e docentenan lo permanece mescos.
