Hulanda: Ministerio di Enseñansa ta bisa cu scarsedad di maestro lo sigui pa proximo dies aña

(NLTimes) – Scolnan lo ta sufriendo di scarsedad di maestro pa e proximo dies aña, funcionarionan di ministerio di Enseñansa a skirbi den un informe anual riba e tema. Sinembargo e scarsedad a baha e aña aki. Pero Secretario di Estado di Enseñansa Basico, Marielle Paul a bisa cu esaki ta un efecto temporal debi na e vencemento di e programa di sosten contra atraso di corona.

Ministerio di Enseñansa a gasta miles di miyones di euro na e Programa Nacional di Enseñansa. Meta di e programa di subsidio aki tabata pa yuda studiantenan alcansa e atraso cu nan a acumula durante e pandemia di coronavirus. E placa por ser usa pa scolnan pa tuma personal extra den servicio temporalmente. E hendenan aki awor ta disponibel pa trabou nobo, y ta p’esey e scarsedad a baha.

Actualmente tin un scarsedad di 7,700 cupo di trabou full-time den e sector di enseñansa primario. Esaki ta alrededor di 2,100 menos cu un aña prome. Den enseñansa secundario, e scarsedad a keda alrededor di 3,800.

Compara cu e cantidad total di trabou, e scarsedad di maestro ta alcansa mas o menos 8% den enseñansa primario y 5% den enseñansa secundario.

Oficialnan di ministerio di Enseñansa ta anticipa cu e scarsedad lo baha un poco den enseñansa primario prome cu e subi riba e nivel actual. Esaki ta parcialmente pasobra e cantidad di studiante lo aumenta den e proximo añanan mientras cu mayoria di docente y miembronan di directiva di scol ta cerca di edad di pensioen.

E scarsedad ta bay sigui aumenta den enseñansa secundario pa e proximo 10 añanan, e escritornan di e rapport ta pronostica. Aunke e cantidad di alumno ta bahando, ta birando mas dificil pa haya maestro pa e materianan di matematica, fisica, kimica, ciencia di computer, Hulandes, Aleman, Frances y idiomanan clasico.

Paul a bisa cu hopi trabou ta ser haci pa purba combati e scarsedad. Por ehempel, e tabata contento cu e noticia cu aproximadamente 2,200 stagiaire lateral di un otro ramo a bira maestro e aña aki, loke “ta yega cerca di e record di aña pasa.”

Tambe el a bisa cu un factor positivo tabata cu colaboracionnan regional entre scolnan ta cuminsa y ta conduci na solucionnan creativo pa e scarsedad di maestro.

E resultadonan positivo aki ta hopi necesario, asina e Secretario di Estado a bisa. “Pasobra manera ta e caso den henter e mercado laboral, e scarsedad ta y ta keda hopi significante.”