Hulanda no lo introduci un impuesto riba sucu den futuro cercano, pasobra e efectividad di un medida asina no a keda comproba ainda, y a haci otro acuerdonan cu companianan di cuminda pa reduci sucu den soft drinks, segun minister di Salud, Paul Blokhuis a bisa parlamento.
Mundialmente, 43 pais a introduci un forma di impuesto riba sucu, incluyendo 20 den Union Europeo, y e minister a ricibi yamado pa haci igual na Hulanda, den un esfuerso pa reduci obesidad. Sinembargo, mientras un comparacion di e forma con impuesto riba bebida yen di sucu ta trahando na Francia, Noruega y Reino Uni ta mustra algun beneficio positivo, no por demostra ainda e efecto a largo plaso, pasobra no a implementa e impuesto pa un tempo suficientemente largo, Blokhuis a bisa.
E investigacion a mustra cu na tur tres pais, consumo di bebida yen di sucu a disminui, y na Noruega ta bendiendo mas boter di awa, pero no ta cla si esaki ta resultado di e impuesto, Blokhuis a bisa informando parlamento. Ademas, sucu no ta e unico causa di obesidad, y otro medidanan ta inclui di programa di bida saludabel di gobierno, el a bisa.
Por ehempel, industria di bebida a bay di acuerdo pa reduci e cantidad di caloria den soft drinks cu 30% pa 2025, compara cu 2012.
Otro opcion cu ta siendo evalua ta haci cuminda saludabel mas barata cu cuminda cu ta contene nivelnan eleva di sucu y vet, e minister a bisa. Investigacion publica pa organisacion di consumidor Hulandes, Consumentebond, luna pasa a mustra cu algun bebida di fruta pa mucha tin mas cu cuatro clompi sucu pa cada porcion.
Y Unicef a bisa den un reporte siman pasa, cual Bon Dia Aruba a publica, cu 75% di cuminda mercadea specificamente na mucha no ta saludabel, conteniendo demasiado caloria, salo, sucu y vet satura, of tabata demasiado abao den fibra. Unicef tambe a haya cu supermercadonan no ta mustra ‘reticencia’ na momento di promociona productonan no saludabel pa mucha, particularmente a traves di uso di personahenan di caricatura popular. Alrededor di 16% di mucha y adolescente na Hulanda tin sobrepeso, y 3% ta considera obeso.
