(NLTimes) – E proximo Gabinete mester suscribi na un tratado internacional pa completamente prohibi sistemanan di arma automatico cu ta determina nan obhetivo riba nan mes, segun parlamentario di D66, Salima Belhaj a bisa.
“Esaki no ta un pelicula ni ciencia ficcion. Mi kier preveni cu nos ta drenta un guera sin precedente”, Belhaj a bisa, segun RTL Nieuws.
Cantidad di sistema di arma ainda ta rekeri control humano, pero varios pais y fabricante di arma ya ta experimentando cu sistemanan di arma completamente automatisa. Esaki ta inclui por ehempel ‘drone kamikaze’, cu ta ataca den grupo, of raket cu por bula centenares di kilometer y di forma independiente selecciona nan obhetivo.
“E expectativa ta cu gradualmente nos lo drenta un era di guera automatisa. Of manera tambe e ta conoci: aligoritmo contra aligoritmo”, Danny Pronk di Clingendael Institute a bisa. “Mi ta kere mester tin un prohibicion riba robot asesino”, Belhaj a bisa. “Solamente esaki por preveni nan yegada y gueranan cu no por pronostica nan consecuencia.”
Belhaj a entrega un memorandum di iniciativa y kier pa Tweede Kamer denuncia sistemanan di arma automatisa por completo.
Pronk a bisa cu e no ta kere cu paisnan cu nenga di participa den e careda di arma automatico ta den desbentaha den caso di guera. “Sea tin un humano tras di e controlnan of no, toch ta logra e efecto. Cu e unico diferencia cu den e prome tin responsabilidad.”
Ministerio di Defensa a declara cu ehercito Hulandes no tin sistemanan completamente automatisa unda humano ta keda afo. Hulanda ta usando sistemanan di arma parcialmente automatisa pa mas cu 20 aña, manera e Goalkeeper den Marina y e Patriot Systems na tera. “E sistemanan ta cendi den caso di un menasa, pero por paga nan na cualkier momento si ta desea”, un vocero di Ministerio di Defensa a bisa.
Algun decena di pais ya ta debatiendo un prohibicion riba sistemanan di arma completamente automatico, pero toch no ta cla den ki direccion actornan mayor, manera Merca, China y Rusia, lo bay. “Esaki ta haci un prohibicion via tratado cu e paisnan aki dificil, si no imposibel na e momento aki”, Pronk a bisa.
