Europese Hof van Justitie diahuebs ultimo a dicta cu Hulanda mester paga pa impuestonan cu no a colecta entre añanan 1997 y 2003 pa productonan importa pa paisnan Europeo.
Den aña 2017 Union Europeo a entama un caso contra Reino Hulandes como miembro di EU pa via cu gobiernonan di Aruba y Corsou a comete erornan den certificacion di productonan pa paga impuesto, unda UE a keda sin cobra 18.5 miyon den invoerrecht. Entre 1997 y 2000 Europa a importa lechi for di Corsou y di aña 2002 pa 2003 Europa a importa hariña for di Aruba sin cobra invoerrecht. Nan a importa e productonan aki sin cobra invoerrecht pasobra esakinan a bin cu e certificacion EUR.1.
Aparentemente Aruba y Corsou no tabatin mag di duna e certificacion aki pasobra e productonan no tabata cumpli cu e condicionnan principal pa por haya e certificacion, esta cu e productonan ta origina for di Aruba y Corsou. E lechi y e hariña tabata registra di tal manera cu a considera nan como un producto local eroneamente, mirando cu nan tabata bin di otro pais.
Interesante di e decision aki ta cu no a dicta contra Aruba of Corsou, ni e importadonan, si no cu a pone Reino Hulandes responsabel. Esaki pasobra ta considera Hulanda como e pais cu tin cu sigura cu cosnan cana segun ley den e islanan, como cu e islanan ta teritorio exterior di Hulanda cu ta conta como LGO pa EU (Landen en Gebieden Overzee).
