Mas di 4 mil scol primario, secundario y special tabata cera mientras maestronan na nivel nacional a bay den welga, exigiendo mas pago y miho condicion laboral.
E maestronan ta exigiendo un aumento structural di fondo pa reduci e presion riba personal di educacion y aumenta salario, mientras scolnan ta reporta falta di maestro. Alrededor di 80% di scolnan na e pais a participa den e welga, cu a coincidi cu un debate di dos dia riba e presupuesto di ministerio di educacion pa 2020.
Diabierna, gobierno a bisa cu lo aloca 460 miyon euro extra pa scolnan, pero unicamente 363miyon di esey ta placa nobo. E pakete tambe ta inclui trece dilanti un gasto di 97miyon euro pa reduci e presion di traha den scol primario, cual tabata marca pa esey na 2017.
E problema mas grandi ta cu ‘nos ta ricibiendo un regalo hopi caro pero e no lo haci nada pa resolve e problema mas grandi enfrentando educacion: nos no lo haya mas pago ni mas maestro’, segun Jan van de Ven, di e grupo di campaña PO in Actie, a bisa NRC. Pasobra mayoria di e placa no ta structural, e scolnan lo uza esaki pa cumpra computer nobo of sink pa baño, el a bisa. “E placa lo disparce y despues e minister lo puntra kico a haci cune.”
Gruponan di campaña ta argumenta cu unicamente un aumento structural di fondo lo permiti scolnan aumenta pago permanentemente y tuma mas maestro den servicio.
Sindicato Aob a bisa cu cuater den dies scol actualmente no tin staf di reemplaso si un maestro mester bira malo. E sindicato ta basa su declaracion riba un investigacion involucrando 6,200 maestro. Un di cada cinco scol primario y un di cuatro scol secundario tambe tin cupo di trabou cu mester yena.
Y den prome siman di e termino nobo, 17% di scol primario y 30% di scol special a manda studiantenan cas pasobra no tabatin niun persona pa duna les, segun Aob. Lobke Vlaming di organisacion di mayor Ouders en Onderwijs a bisa NOS cu 84% di mayor ta preocupa tocante incumplimento cu standard y klasnan hopi grandi.
