Hulanda: lo no bin un visa obligatorio pa Venezolano

DEN HAAG – Minister di Asuntonan Exterior di Hulanda a bisa parlamento Hulandes cu lo no bin un visa obligatorio pa Venezolanonan cu kier bin Aruba, Corsou y Boneiro. Tampoco ora e situacion na e pais Latino Mericano lo deteriora mas.

Esaki nos partner den noticia Ret Karibense ta informa. E minister demisionario esta Bert Koenders a duna e splicacion aki den Tweede Kamer como cu parlamentarionan Hulandes a pidi pa informacion riba inmigracion for di Venezuela y scenarionan den e caso cu e situacion ta deteriora. Sinembargo e minister no kier a comparti mucho. Den e debate minister Ronald Plasterk tambe tabata presente como esun encarga cu Asuntonan di Reino. El a bisa cu e no tin cifranan di migracion nobo y tampoco por comparti nan cu e parlamentarionan Hulandes pasobra Aruba y Corsou a pidi pa no haci esaki. Como cu e informacion aki por stimula migracion for di Venezuela direccion di e islanan concerni.

Gobiernonan di Aruba, Corsou y tambe Hulanda a expresa nan preocupacion si riba e aumento di Venezolanonan cu ta drenta den ilegalidad. Pero e ministernan Hulandes no ta pensa cu un visa lo yuda contra e fenomeno aki y hasta tin un efecto contrario esta cu mas Venezolanonan lo bin e islanan.

Manera conoci caba mayoria di e Venezolanonan ta yega Aruba via aeropuerto y no ria botonan. Nan ta bin como turista y despues no ta regresa bek. Segun e ministernan Hulandes tin solamente 1 Venezolano te awor cu a pidi asilo, esta na Boneiro. Y nan a manda e persona aki finalmente bek, segun sr. Plasterk. E persona aki tampoco a apela e caso.

E debate aki ta e di cinco cual a tuma luga den dos aña den Tweede Kamer. Sinembargo no ta duna e claridad riba entre otro e cantidad di Venezolanonan cu ta drenta e islanan. Autoridadnan local te ainda nunca a duna cifranan oficial. Aruba si ta pidi pa asistencia di Hulanda pa bin cu un plan conhuntamente y asina tin algo regla den e caso cu Venezolanonan lo huy masalmente pa e islanan. Pero te awor nada concreto a wordo regla den Reino.

MEP a bisa caba cu ora nan ta den gobierno nan kier un areglo mas stricto pa Venezolanonan. POR su lider Otmar Oduber ya a bisa den pasado caba cu nan ta pro introduccion di un visa.