Speculacion tocante accion di parti di Hulanda ta prematuro
Presupuesto 2016 ta laat caba; esey ta e comentario cu ta cuminsa sali di tur banda awor. Segun e ley nobo riba CAFT cu e gobierno aki mes a introduci, pa no haya nan mes cu un medida di Reino cu lo a impone un supervision financiero di mesun tipo, presupuesto di e aña venidero lo mester ta aproba pa mas tarda 15 di december. Ya cu ainda no tin e conseho di Raad van Advies, nada a bay pa Parlamento ainda y por lo tanto, si no bin cambio den e dianan aki, no por cumpli cu e fecha final aki.
Pero cu esey no tin motibo pa panico ainda. E ley ta bisa tambe cu, si no tin ley aproba, pero tin e perspectiva cu den un tempo rasonabel e lo keda cla, tambe ta bon. Es decir, gobierno di Reino no lo bay maha si e ley lo keda aproba den inicio di aña. Esey si por ta e caso, ya cu CAFT a duna su opinion encuanto e presupuesto caba, y despues di conseho di Raad van Advies no tin otro obstaculo pa yega Parlamento, despues cu gobierno caba di contesta riba e conseho di Raad van Advies.
Sin embargo, tin otro problema mas serio y mas urgente ainda na caminda. Ta trata di e ley di e asina yama ‘suppletoire begroting’, e presupuesto suplementario o complementario 2015. Esaki tambe mester keda trata y aproba prome cu aña caba, pero tin e problema cu e no a ni cuminsa cana e caminda legal ainda. Asina leu cu nos informacion ta alcansa, e propuesta di ley no a bay ainda pa CAFT, te pa nan conseha, pa gobierno inclui contesta riba nan conseho den nan propuesta, pa despues tur cos bay pa Raad van Advies, pa nan haci nan trabao, pa despues gobierno contesta Raad van Advies, pa despues tur cos bay Parlamento…
Tur esaki ta zona manera un ‘mission impossible’ prome cu fin di aña. Pregunta grandi ta kico ta bay ta e reaccion di parti di Hulanda; ta bin sancion contra gobierno di Aruba, o ta warda te ora cos bira preta atrobe, ora cu Aruba mester cumpli cu pagonan grandi den exterior y Aruba mester di prestamo na nivel internacional, pa cual nan mester tin aprobacion di Reino. E wega di semper: di e gato cu ta laga e raton core rond haci loke raton ta haci, te ora… Esey por ta e caso, y lo tin mas motibo pa actua asina.
Pa cuminsa, Hulanda lo bay hunga e carta di e supervisor di buena boluntad cu ta ofrece su ayudo tecnico pa Aruba por maneha e asuntonan financiero miho. Esey no ta nada straño pasobra durante gabinete Oduber tambe tabatin e tipo di apoyo aki. Cu den e asistencia tecnico aki ta purba influencia pa bay mas den direccion cu Hulanda kier bay, ta mas cu logico. Esey tambe ta e trabao cu por spera di CAFT cu, banda di nan conseho den nan reportahe, ta supone cu ta duna e asistencia aki tambe den e comunicacion confidencial cu e autoridadnan financiero, e ministro concerni y e top di e funcionarionan di e departamentonan envolvi.
Esey no ta haci simplemente pa ta ‘bon hende’ pero tambe pasobra esey ta loke bon colaboracion den Reino ta exigi. Na final di dia, ora cu mester tuma medida, si cos yega asina leu, Hulanda mester por proba cu nan a purba yuda Aruba den bon cooperacion, pero lamentablemente e consehonan no tabatin e efecto cu nan a spera. Den e conseho cu Raad van State a duna algun tempo pasa por lesa e recomendacion aki bon cla.
Tin otro motibo mas pa no actua fuerte awor caba y esey ta cu Hulanda mester di Premier Eman ainda den su papel di ‘guest star’ den propaga Aruba como frontrunner den asunto di sostenibilidad y medio ambiente den teritorio chikito, manera e islanan Hulandes den Caribe. Eleccion pa miembronan nobo di Conseho di Siguridad di Nacionnan Uni, unda Hulanda ta aspira un puesto, lo tuma luga na juni 2016. Esey significa cu te e tempo ey ‘no lo busca problema’ y lo trata di tene e tema financiero di gobierno di Aruba ‘low profile’ y gobierno di Aruba tambe ta consciente di esaki.
Como tal no ta spera ningun reaccion fuerte di parti di gobierno Hulandes awor cu ta resulta cu presupuesto 2016 lo keda aproba te den 2016, y tambe e presupuesto suplementario lo no keda trata mas e aña aki. Cos lo bira interesante ora resulta cu na final di e aña aki, e teoria di gobierno di Aruba keda desbarata y e tiki crecemento den turismo no keda traduci den mas entrada pa gobierno. E pregunta grandi lo ta con ta sigui anto pa 2016: simplemente purba aumenta entrada via mas medida di impuesto, of realmente cuminsa corta gasto pa por traha cu un budget mas chikito. Temponan interesante nos dilanti, pero no necesariamente pasobra lo tin un confrontacion cu Madre Patria.
