Hulanda: Liña di guia nobo pa reduci dependencia di medicacion antidepresivo na un manera sigur

(NLTimes)—Dokter, botica y pashent awo tin acceso na un liña di guia nobo y comprensivo riba e reduccion di e uzo di medicacion antidepresivo na un manera sigur. Hopi proveedo di cuido ta falta conocemento pa guia hende pa reduci nan dependencia riba e medicamentonan aki. E liña di guia nobo—crea pa asociacionnan di psikiatra, mediconan general, farmaceuticonan y e organisacion pa pashent Mind—ta diseña pa cambia esaki, NOS ta reporta.

E colaboracion a publica su prome liña di guia na 2018 riba e reduccion di e uzo di antidepresivonan mas comun. Esun nobo ta cubri tur antidepresivo, cu instruccion di stap pa stap pa kita di nan.

Aproximadamente 250.000 hende na Hulanda ta tuma antidepresivo riba plaso largo. Hopi hende kier stop na dado momento pa via di efectonan cu e medicacionnan ta causa of pa wak si nan salud mental por keda stabiel sin medicacion. Pero pa stop di uza no semper ta facil.

Si e intento pa para tuma luga hopi lihe, hende por experencia un recaida den depresion of psicosis, of nan por sufri di sintomanan di retiro. Keho psicologico tambe por sosode. Tin biaha tur e sintomanan aki por indica un chens di un recaida.

“Pues ademas di liñanan di guia y e dosis, e manual tambe ta splica cual señalnan dokter mester tuma nota di dje pa mira den curso di tempo di tin un riesgo di un recaida durante e proceso di retiro,” segun Eric Ruhe, ken ta co-autor di e documento como un psikiatra na Radboudumc, NOS a splica. “Asina nos ta spera cu mas dokter ta purba di guia hende. Pasobra si bo sigui e stapnan, bo por yega leu. Y si bo no por logra, bo por consulta un psikiatra of farmaceutico. Esey tambe ta e bentaha di e manual multidisciplinario; en berdad e ta un colaboracion di diferente disciplina.”

Psikiatra Christiaan Vinker di Amsterdam UMC, ken no tabata envolvi den e creacion di e manual, ta emociona pa e oportunidadnan cu esaki ta ofrece: “Esaki por ta un stap importante pa crea e posibilidad di retiro mas accesibel, teniendo na cuenta cu esaki ta cuadra cu e historia di e pashent. Pero e no ta bay ta posibel pa tur hende,” el a bisa. “Den pasado, dokternan tabata satisfecho cu tabatin un medicina cu ta traha. Casi nunca tabatin e pensamento pa retira di e medicacionnan aki. Pero awo esey ta keda den pasado.”