Hulanda: Ley pa regula eutanasia pa muchanan cu malesa terminal ta tuma efecto otro aña

(NLTimes)—Cuminsando otro aña, eutanasia lo ta posibel na Hulanda pa muchanan entre 1 pa 12 aña cu ta sufri demasiado pa via di nan malesa. Minister di Salud Ernst Kuipers ta spera cu e regulacion nobo lo tuma efecto riba 1 di januari 2024. Tweede Kamer a aproba di e propuesta aki durante un debate riba asuntonan di etica medico.

Part di Tweede Kamer a cuestiona solamente e opcion pa uza un regulacion en bes di ley. Pero Kuipers a opta pa regulacion pa via di e complehidad y sensitividad di e plan. Partidonan D66, GroenLinks, PVV, SP y SGP, entre otro, a argumenta cu e complehidad y sensitividad tabata un motibo pa pone den legislacion.

Segun Kuipers, no tin suficiente ehempel pa yega na un standard pa legislacion. El a bisa cu no ta comun pa muchanan jong ta asina malo cu nan mayor- y dokternan ta mira morto como e unico opcion. E ta considera ehempelnan necesario pa legislacion. Kuipers a indica cu ora ta desaroya un standard, e lo mester tambe considera situacionnan unda terminacion di bida no a ser scogi ora esaki tabata un opcion. Parlamentario di GroenLinks, Corinne Ellemeet a insisti riba esaki.

Banda di e discusion di uza regulacion of legislacion, Parlamentario di VVD, Harry Bevers, ta “satisfecho” cu muchanan cu malesa terminal por “muri cu dignidad” cuminsando 2024. E ta spera cu e regulacion lo termina e “dilemma pa dokternan” ta administra eutanasia pa muchanan jong cu no por dicidi pa nan mes.

Ellemeet di GroenLinks tambe a nota durante e debate cu dokternan ta resisti di haci abortus di etapa laat si tin un abnormalidad severo, pasobra nan tin miedo di persecucion. Segun e, p’esey hende muhenan mester bay Belgica, unda dokternan si lo haci e abortus despues di un evaluacion di e necesidad. Na Hulanda, e evaluacion ta tuma luga despues di e operacion. GroenLinks a aboga pa un evaluacion den avance. Partido VVD ta di acuerdo cu esaki. E minister a priminti pa investiga con cos ta organisa na Belgica.

Ademas, Fleur Agema di PVV tabata kier clarificacion for di e minister tocante e banda etico di inteligencia artificial den cuido medico. “Kico ta aceptabel den e contexto di contacto humano, y kico no?” el a puntra Kuipers. E minister a priminti pa manda un carta pa Tweede Kamer riba e topico aki prome cu fin di aña.